Ka waiūtepe wanila custard

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ua ʻōlelo ʻia he meaʻai hāʻehuola ka waiūtepe, no ka mea, nui ka polokina, ke kalipuna, ka wikamina B6 a me ka wikamina B12. Makemake au i ka waiūtepe a kūʻai pinepine. I koʻu hele ʻana aku i ka mākeke nui i kēlā pule aku nei, ua loaʻa iaʻu he waiūtepe hou. ʻO ka waiūtepe wanila custard ka waiūtepe hou i kūʻai ʻia aku ai. Nui koʻu makemake i nā meaʻono me ka wanila. ʻOno nō, ʻeā? A, ʻono loa kēia waiūtepe hou! ʻĀ! Aia he huaʻōlelo Hawaiʻi no custard? ʻAʻole i loaʻa ma ka puke wehewehe ʻōlelo.Eia ka ʻikepili kūlana ʻaiaola o kēia waiūtepe no 100 kalame.

• ikehu‘ā .................................... 110 ikpk.
• polokina .................................. 4.0 kal.
• ‘ailakele .................................. 3.2 kal.
• kōpia ....................................... 16.2 kal.
• sodiuma .................................. 39 mkal.
• kalipuna .................................. 138 mkal.

ʻAno nui paha ka ʻailakele kō loko, akā, inā ʻai au 100 kalame wale nō i hoʻokahi lā, ʻaʻole pilikia!

A hui hou.

ʻO Nice Simon

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

I kēia makahiki, ua hoʻomaka au e aʻo mai i ka ʻōlelo Heiti. Nui koʻu paʻahana i nā lā a pau, akā, hoihoi au iā Heiti, no laila, makemake au e hoʻopaʻa i ka ʻōlelo o kēlā ʻāina. ʻAno like ka ʻōlelo Heiti me ka ʻōlelo Palani, akā naʻe, nui ka ʻokoʻa. He ʻōlelo paʻiʻai ka ʻōlelo Heiti. Iā ʻoe hoʻolohe i ka ʻōlelo Heiti, manaʻo ʻoe 「ʻĀ! ʻO ka ʻōlelo Palani nō kēia!」 no ka mea, nui nā huaʻōlelo Palani i hoʻohana ʻia. Iā ʻoe heluhelu i kekahi ʻatikala i kākau ʻia ma ka ʻōlelo Heiti, ʻaʻole maopopo paha iā ʻoe, no ka mea, ʻokoʻa ka pilinaʻōlelo Heiti me ka pilinaʻōlelo Palani.

I koʻu hoʻomaʻamaʻa ʻana i ka ʻōlelo Heiti i kēia pō, ua huli au i kekahi wikiō ma YouTube no ka hoʻolohe i kēia ʻōlelo hou. Ua loaʻa iaʻu ka wikiō i kapa ʻia ʻo La Victime. He moʻolelo kaumaha kēia kiʻiʻoniʻoni e pili ana i kekahi ʻohana ʻilihune ma Heiti. ʻO Nice Simon ka hāmeʻe nui o ia kiʻiʻoniʻoni. E kaomi mai ma ʻaneʻi no kona kahua paʻa.

ʻO Nice Simon

A hui hou!

Ka mokupuni ʻo Polapola

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

ʻAʻole nui nā ʻatikala aʻu i kākau ai ma ʻaneʻi i kēia mahina, no ka mea, ua hoʻomaka ke kau kula hou ma Iāpana nei a paʻahana nō au.

Hoihoi au i nā ʻāina ʻē aʻe ma Polenesia. I kēia mau lā piha i ka hana, ua loaʻa kēia kiʻi ma ka pūnaewele no ka mokupuni ʻo Polapola ma ka Polenesia Palani. He keu a ka nani! Ke nānā au i kēia kiʻi, hiki iaʻu ke noʻonoʻo i kekahi huakaʻi i ka ʻāina mamao.

ʻO Polapola

A hui hou!

Ka maʻi kekea ma ʻApelika

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

I koʻu nānā ʻana i ke kīwī Heiti ma ka pūnaewele i kēia lā, aia he polokalamu piʻoloke loa e pili ana i ka pepehi ʻana a make i nā kekea ma ʻApelika. Ma kēlā polokalamu, ua ʻōlelo ʻia nui nā kekea ma ʻApelika. Ma nā ʻāina o ʻApelika Hikina (Tanazania, Kenia, Suazilana a pēlā aku), manaʻo nā kānaka nui ka mana ma loko o ke kino kino. No laila, pepehi a make nā kekea no ka loaʻa ʻana i nā iwi, i ka lauoho, a i ʻole ke koko. Hana ke kauka kuʻuna (ke kauka hoʻokalakupua) i ka ʻapu (ka mea inu lāʻau) o nā māhele kino a i ka inu ʻana iho, hele a waiwai ka mea noi ʻapu. Auē! Minamina kēia manaʻo.

He pēpē kekea ma ʻApelika

Ke hoʻāʻo nei nā aupuni o ia mau ʻāina e hoʻopau i kēia hana kuʻuna. Ua hoʻokoho ka pelekikena Tanazania ʻo Jakaya Kikwete iā Al-Shymaa Kway-Geer i ke aupuni no ka hoʻomaikaʻi ʻana i ke kūlana o nā kekea ma ua ʻāina nei. He wahine kekea ʻo Al-Shymaa Kway-Geer.

ʻO Al-Shymaa Kway-Geer

Ua huli au i nā ʻatikala nūhou a i ʻole nā kahua paʻa e pili ana i kēia pilikia kaiapili ma ka pūnaewele. Nui nā ʻatikala. A ua loaʻa ka polokolamu kīwī ma National Geographic kekahi. hiki i kēia lā, ʻaʻole au i ʻike i kēia pilikia ma ʻApelika.

Ma hope o koʻu heluhelu ʻana i kekahi mau ʻatikala e pili ana i ka pepehi ʻana i nā kekea ma ʻApelika, ua loaʻa ka inoa o ka mea hōʻikeʻike paikini (model) ma Nūioka. ʻO Shaun Ross ʻo ia a he pāʻele kekea ʻo ia. He mea hōʻikeʻike paikini a he mea hulahula ʻo ia. Ua puka ʻo Shaun Ross i ka wikiō puolo o Kate Perry i kapa ʻia E. T. ʻO Shaun Ross ka lopako ma ka hopena o ka wikiō.

ʻO Shaun Ross

ʻO E. T. na Kate Perry

A hui hou!

ʻO Kona Legends

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

ʻO Kona Legends na Eliza D. Maguire

Nui kaʻu puke ma ka hale! I kēlā pule aku nei, ua heluhelu au i kēia puke pōkole ma ka ʻōlelo Pelekānia. Nui nā moʻolelo e pili ana i nā inoa ʻāina o Kona. ʻO ka moʻolelo ʻo He Ano o Mākālei kaʻu moʻolelo punahele i loko o kēia puke. He moʻolelo e pili ana i ke keikikāne ʻo Mākālei a me kona makua kāne. Ua loaʻa iā lāua kekahi ana huna a nui ka wai ʻoluʻolu ma loko. Kapu nā ana ʻē aʻe ma kahi i ko lāua noho ʻana. Hoihoi nā moʻolelo e pili ana i nā inoa ʻāina, ʻaʻole anei?

A hui hou!

ハワイ語

Ka pōpoki 002

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

E hoʻouka ana au i ke kiʻi o kekahi pōpoki ʻē aʻe aʻu i nānā ai ma ka pūnaewele i kēia mau lā. ʻAno like kēia pōpoki me ka pōpoki Uliuli Lūkia. Nani loa nā maka o kēia pōpoki, ʻeā? A like ka hulu o kēia pōpoki me ka weleweka. Makemake au e hamo i ka ihu a hoʻolohe i ka nonolo ʻana o kēia pōpoki kupaianaha.

A hui hou.

ハワイ語

Ka Lēkiō

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Hoʻolohe ʻoukou i ka puolo hea? Makemake au i nā ʻano puolo like ʻole a ke noho au i koʻu keʻena noho, ʻo ka mea maʻamau, hoʻolohe au i ka lēkiō ʻo am 940 Hawaiʻi ma ka pūnaewele, no ka mea, nui nā mele i hīmeni ʻia ma ka ʻōlelo Hawaiʻi.

Inā ʻaʻole ʻoe kamaʻāina i kēia kānela, e kaomi mai ma ʻaneʻi! Hiki nō hoʻi iā ʻoukou ke kipa i ke kahua paʻa ma ʻaneʻi.

A hui hou!

ハワイ語

Kaʻu huakaʻi i Kōlea - Malaki 2011 - ka lā ʻekolu

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

ʻO ka lā iwakāluakūmākahi o Malaki ka lā ʻekolu o kaʻu huakaʻi i Kōlea. Ma ia lā, ua launa au me kekahi mau hoaaloha Kōlea oʻu no ka ʻai ʻana a me ke kūʻai hele ʻana i nā lole ma Nampo-dong (남포동 南浦洞) i Busan. Makemake au i ke kūʻai hele ʻana ma Kōlea, no ka mea, ʻOi aku ke emi o nā kumukūʻai ma Kōlea ma mua o nā kumukūʻai ma Iāpana. A maikaʻi nō ke kaila o nā lole Kōlea!

ʻO Inside ka inoa o kēia hale kūʻai lole kāne. Ua kūʻai mai au i ʻelua lole wāwae a me hoʻokahi pālule ma ʻaneʻi. Ua hoʻāʻo aku nei au e paʻi i kekahi mau kiʻi o nā lole, akā, ʻano paʻakikī a ʻaʻole nani nā lole ma loko o nā kiʻi. No ke aha? No laila, ʻaʻole au e hoʻouka ana i nā kiʻi ma kaʻu puke moʻomanaʻo pūnaewele.

ʻO kēia ka pukaaniani hōʻikeʻike o Inside.

Eia kekahi hale kūʻai lole kāne ʻē aʻe. ʻO Rush ka inoa o kēia hale kūʻai a nui nā lole aʻu i kūʻai mai ai ma ʻaneʻi. Maikaʻi nō ke kaila a ua maka launa nā limahana hale kūʻai.

Ka pukaaniani hōʻikeʻike o Rush

Kekahi mau lole o Rush

Ke hoʻolālā nō hoʻi nei au i ka huakaʻi aʻe i Kōlea ma ka hopena o kēia mahina ma ka wā hoʻomaha o ka Pule Gula. Hiki iaʻu ke ʻai hou i nā meaʻai Kōlea ʻono a ke kūʻai hele ʻana i nā lole kū i ke kaila.

A ma ka lā ʻehā, ua hoʻi mai au i Iāpana me kaʻu pāisi piha loa i nā mea Kōlea, ʻo ka meaʻai ʻoe, ʻo ka lole ʻoe, ʻo ka puke ʻoe. He huakaʻi leʻaleʻa!

A hui hou.

Kaʻu huakaʻi i Kōlea - Malaki 2011 - ka lā ʻelua

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

He aha kaʻu hana ma ka lā ʻelua o kaʻu huakaʻi i Kōlea? He ua hoʻokini a ua moe awakea au ma ka lā ʻelua. Ma hope o koʻu ala ʻana, ua hoʻopaʻa au i kekahi pākaukau ma ka hale ʻaina ʻo Dongnae Byeoljang (동래별장- 東萊別莊) ma Dongnae i Busan. ʻAno ʻokoʻa ke kaila o kēia hale, no ka mea, na nā Kepanī i kūkulu i kēlā hale ma ka makahiki 1940, akā, lawelawe nō ʻia ka meaʻai Kōlea kuʻuna ma laila i kēia wā. ʻAno pipiʻi kēia hale ʻaina. Ua uku au ma kahi o kanakolukūmālima kālā no ka ʻaina awakea. He ʻaina piha me ʻiwakāluakūmāhā pā like ʻole. Ma hope o ka ʻaina, ua māʻona au!

Ka ʻīpuka

Kekahi lumi ʻaina ma loko o ka hale ʻaina

ʻAe, ua ʻono loa nā pā a pau!

A hui hou!

Kaʻu huakaʻi i Kōlea - Malaki 2011 - ka lā mua 04/04

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ma hope o koʻu nānā ʻana i ka hōʻike ma ke Kikowaena Aupuni o nā Pāhiahia Kuʻuna Kōlea ma Busan, ua hele au i Seomyeon (서면- 西面) ma Busan no ka ʻai ʻana i ka ʻaina ahiahi. ʻO Seomyeon kekahi ʻāpana pāʻoihana kauwaena kaulana loa o Busan. No laila, nui maoli nā hale ʻaina a me nā hale kūʻai kekahi ma Seomyeon. Ma mua i kaʻu huakaʻi, ua huli au i kekahi mau hale ʻaina hou ma Busan. Ua ʻai au ma ʻaneʻi. ʻO Shinto Buli (신토불이- 身土不二) ka inoa o kēia hale ʻaina. Ua ʻono!

Ua ʻono ka puʻu!

ʻĀ! Ua nānā paha ʻoukou i ka ʻōmole pia ma luna o ke pākaukau? ʻAe, ʻono loa ka meaʻai Kōlea me ka pia!

Auē! Ua hele au a pōloli i kēia manawa...

A hui hou.

Kaʻu huakaʻi i Kōlea - Malaki 2011 - ka lā mua 03/04

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ma hope o ka ʻaina awakea o ka lā mua, ua hele au i ke Kikowaena Aupuni o nā Pāhiahia Kuʻuna Kōlea ma Busan (국립부산국악원) e nānā i kekahi hōʻike o ka hulahula a me ka puolo kuʻuna Kōlea. ʻAkahi nō au a hele i laila. Ua nui koʻu pūʻiwa i ka nani o kēlā hale a me ka pā. Ua paʻi au i kekahi mau kiʻi ma ka pā a i loko o ka lumi hoʻokipa o ka hale. Ua makemake au e paʻi i kiʻi a i ʻole wikiō o ka hōʻike, akā, ua pāpā ʻia. He kanaiwa minuke ka lōʻihi o ka hōʻike a ua uku au i 6,400 kālā Kōlea (ma kahi o ʻeono kālā ʻAmelika) no ke kikiki. Inā hele ʻoukou i Busan, e hele aku i laila e nānā i ka hōʻike.

ka pā

He kiʻi i paʻi ʻia a kokoke o ka pā. Nani kēia hakulau kuʻuna Kōlea i haku ʻia i nā winihapa.

He kiʻi o ka ʻaoʻao o ka noho lōʻihi ma ka pā. Makemake nui ʻia nā manu ʻū ma Kōlea. He hōʻailona o ke ola lōʻihi a me ke olakino maikaʻi ka manu ʻū.

He kukui lewa me ka pulelehua ma ka lumi hoʻokipa

He hakulau o ka pulelehua paha ma ka puka

Kekahi kukui ʻē aʻe

kaʻu kikiki

Ua loaʻa kekahi wikiō ma ka pūnaewele o ka hulahula kuʻuna Kōlea aʻu i nānā ai ma kēlā lā. ʻO 춘앵전 (春鶯囀) ka inoa. ʻAno paʻakikī kēia mau huapalapala Pākē. Makemake au i ka puolo o kēia hulahula.

A hui hou!

ʻAʻole pau...

Kaʻu huakaʻi i Kōlea - Malaki 2011 - ka lā mua 02/04

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ma hope o koʻu hiki ʻana i ke awa o Busan, ua hele koke au i ka hōkele, a ma hope iho, hele akula i kekahi hale ʻaina koke i ka hōkele e ʻai i ka ʻaina awakea. ʻO ka 뼈다귀해장국 (ppyeoda gwi haejangguk) ka inoa o ke puaʻa kū aʻu i ʻoka ai ma ka hale ʻaina. He 6,500 kālā Kōlea a i ʻole 6.50 kālā ʻAmelika no kēia ʻaina o ka puaʻa kū ʻono loa me ka laiki, nā pīkala Kōlea (김치 kimchi) a me nā meaʻai ʻē aʻe like ʻole. ʻŌlelo ʻia he meaʻai maikaʻi kēia puaʻa kū i ka hoʻopolapola ʻana i ke poʻo huaʻi lama. Ua heluhelu aku nei au i ka ʻatikala e pili ana i kēia kū ma Wikipikia, hoʻokomo ʻia ke koko pipi i loko o kēia kū. ʻO ia? ʻAʻole au i ʻike, akā, ʻo ka mea aʻu i ʻike ai, he meaʻai ono loa a makemake au e ʻai hou ma Kōlea i kēia mua iho i kēia mua aku.

Eia ka puaʻa kū ʻo ppyeoda gwi haejangguk

A hui hou!

ʻAʻole pau....

Kaʻu huakaʻi i Kōlea - Malaki 2011 - ka lā mua 01/04

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā.

ʻAʻole hiki iaʻu ke kākau ma ʻaneʻi i kēlā mau lā aku nei, no ka mea, ua ʻano paʻahana au ma hope o kaʻu huakaʻi i Kōlea. Ua kau au i luna o ka moku halihali wikiwiki ʻo Beetle i ke kakahiaka nui no ka hele ʻana i Busan ma Kōlea. Ua uku au i ʻelua haneli kanakoku kālā no ka holopuni. ʻEkolu hola ka lōʻihi o ka hele ʻana i Busan ma kēia moku halihali wikiwiki. Aia ʻelua haneli ʻumikūmākolu kilomika ma waena o Fukuoka a me Busan.

Eia ke ala o ka moku halihali wikiwiki.

Eia ka moku halihali wikiwiki.

Eia kaʻu kikiki no Busan.

ʻAʻole pau....

ハワイ語

Aia He Kāheka

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ua heluhelu au iā Aia He Kāheka ma Ulukau ma kēlā pule aku nei. He puke kēlā no nā kamaliʻi, no laila, ʻaʻole paʻakikī loa. ʻĀ! Aia he waihona leo ma Ulukau no kēia puke. Inā makemake ʻoukou e hoʻolohe i kēia moʻolelo, e kaomi mai i ke pihi ʻo waihona leo ma mua o ke kiʻi o ka pahu leo ma laila. I koʻu manaʻo, he hoʻomaʻamaʻa maikaʻi. E hoʻolohe mai!

kaʻu kiʻi punahele o ka puke

A hui hou.

Ka Ulia Nukelea

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ua māluhiluhi au i kēia pō ma hope o ka nānā ʻana i nā nūhou e pili ana i ka ulia nukelea o Fukushima ma ke kīwī pūnaewele. A i koʻu manawa kaʻawale i kēia lā, ua heluhelu au i nā ʻatikala nūpepa he nui e pili ana i ka ʻōlelo ʻana mai o ke aupuni ʻAmelika -- makaʻu loa ke kūlana ma Iāpana i kēia manawa; ʻoi aku ka haʻalele ʻana o nā ʻAmelika ... Auē! Luʻuluʻu nō kēia nūhou a pau. Aia paha nā pilikia olakino i kēia mua iho i kēia mua aku. He manaʻolana koʻu, pau koke nā pilikia nukelea ma Iāpana.


A hui hou.

Ke Ōlaʻi, Ke Kai Eʻe, Ka Ulia Nukelea

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Nui nā nūhou maikaʻi ʻole e pili ana i ke ōlaʻi, i ke kai eʻe a me ka ulia nukelea i kēia pule. Nui ka minamina! Noho au ma kekahi mokuʻāina hema o Iāpana, no laila, i koʻu manaʻo, palekana mākou ma ʻaneʻi. Akā naʻe, kaumaha nō nā nūhou a minamina ka poʻe ma ka ʻākau, ʻeā?

ke ōlaʻi

ke kūkala pōʻino kai eʻe

he ihoiho a he pule

- manaʻolana -

A hui hou.

Nā Haʻawina ʻŌlelo ʻInidonesia

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

Ua paʻahana loa au i ka aʻo ʻana mai i ka ʻōlelo ʻInidonesia i kēlā makahiki aku nei. Ua loaʻa iaʻu kekahi kumu ʻōlelo ma ka pūnaewele. ʻO Silvia ka inoa o kaʻu kumu ʻōlelo ʻInidonesia. Noho ʻo Kumu Silvia i Bandung ma ka mokupuni o Jawa ma ʻInidonesia a noho au ma Iāpana. Hiki nō iā māua ke hoʻomaʻamaʻa pū ma Skype. I kēlā makahiki aku nei, ua hui au me Kumu Silvia no ʻekolu hola i kēlā me kēia pule ma Skype a ua hoʻopaʻa hoʻokahi au i nā haʻawina, nā huaʻōlelo, a me ka pilinaʻōlelo o kēia ʻōlelo hou i ʻelua hola paha ʻekolu hola paha i nā lā a pau. Ua paʻahana loa, ʻeā?

Ma Kekemapa, ua huakaʻi au i ka mokupuni kaulana loa o ʻInidonesia -- ka mokupuni ʻo Bali, a lele maila ʻo Kumu Silvia kekahi i Bali no ke aʻo ʻana mai iaʻu i ka ʻōlelo ʻInidonesia no kanahākūmāhiku hola i loko o ʻumi lā!

Ke hoʻomau nei au i nā haʻawina ʻōlelo ʻInidonesia me Kumu Silvia i kēia makahiki kekahi, akā, hoʻomaʻamaʻa au i hoʻokahi haʻawina no kanaiwa minuke wale nō i loko o hoʻokahi pule.

Hoihoi ka ʻōlelo a me ka moʻomeheu o ʻInidonesia!

Eia kekahi puke aʻo aʻu i hoʻohana ai

Makemake paha ʻoukou kekahi e hoʻopaʻa i kekahi mau hopunaʻōlelo ʻInidonesia?

ka ʻōlelo Hawaiʻi - ka ʻōlelo ʻInidonesia
Aloha kakahiaka. - Selamat pagi.
ʻO ʻAnalū koʻu inoa. - Nama saya ʻAnalū.
Noho au ma Iāpana. - Saya tinggal di Jepang.
Makemake au i nā pōpoki. - Saya suka kucing.
Mahalo. - Terima kasih.
ʻelima - lima (e like me ka ʻōlelo Hawaiʻi!)
iʻa - ikan (e like me nā ʻōlelo Polenesia, ʻeā!)

A hui hou.

He Mau Poʻoleka

Aloha mai nō kākou e nā makamaka heluhelu a me koʻu mau hoaaloha! Pehea ʻoukou i kēia lā?

Ua hele au i ka hale leka kokoke i koʻu hale papaʻi i ka ʻauinalā nei no ke kūʻai ʻana mai i kekahi mau poʻoleka no nā leka halilele, no ka mea, pono au e kākau i nā leka i kuʻu mau mākua ma ʻAmelika. ʻAʻole au i leka aku i kuʻu mau mākua i hoʻokahi manawa i kēlā makahiki aku nei!! He keiki kāne maikaʻi ʻole au! I kēia makahiki, makemake au e leka iā lāua i ʻelua manawa paha ʻekolu manawa paha i hoʻokahi mahina.


Nui ka makemake o kuʻu makuahine i nā pua, no laila, i koʻu ʻike ʻana i kēia mau poʻoleka, hoʻoholo koke ihola i ke kūʻai ʻana no ka hoʻohauʻoli ʻana iā Māmā.

A ʻo ʻoukou, makemake ʻoukou i ka pua hea? ʻAno liʻiliʻi kēia kiʻi a ʻaʻole maopopo maikaʻi paha... Makemake paha kuʻu Māmā i nā poʻoleka loke ma luna o kēia laulahi poʻoleka.

A hui hou.

He Mea Hoʻohana iPhone Au

Aloha mai nō kākou e nā makamaka heluhelu a me koʻu mau hoaaloha. Pehea ʻoukou i kēia lā?

I ʻelua makahiki aku nei au i kūʻai mai ai i kelepona lawelima hou. He iPhone 3GS kēlā. I kēia manawa, ʻano kahiko ka 3GS, akā, pipiʻi no ka hoʻololi ʻana i ka iPhone 4 a i ʻole ka iPhone 5. E kali ana au a hoʻololi ma hope. Hoihoi loa kaʻu iPhone, no ka mea, nui nā polokalamu liʻiliʻi. A hiki ke kākau i nā kahakō a me nā ʻokina ma iPhone!

Eia ke kiʻi aʻu e hoʻohana nei ma ka pepa paia i kēia manawa. He kiʻi o ka pāheona Kōlea i loaʻa ma ka pūnaewele ma ka manawa lōʻihi ma mua.

A hui hou.

Ka Pōpoki 001

Aloha mai nō kākou e nā makamaka heluhelu a me koʻu mau hoaaloha! Pehea ʻoukou i kēia lā?

He kanaka aloha nui au i nā pōpoki! I koʻu wā liʻiliʻi a i koʻu noho ʻana me koʻu mau mākua ma ʻAmelika, ua mālama mau mākou i nā pōpoki ma ka hale. Inā hiki, makemake nō au e mālama i kekahi pōpoki i kēia manawa kekahi ma Iāpana nei, akā, pāpā ʻia ka mālama ʻana i nā hānaiahuhu ma koʻu hale papaʻi ma ʻaneʻi. Aloha ʻino.


E hoʻāʻo ana au e hoʻouka i kekahi mau kiʻi o nā pōpoki i kēlā me kēia manawa ma kaʻu puke moʻomanaʻo pūnaewele. E hoʻomaka au me kēia kiʻi i kēia lā. Ua loaʻa kēia pōpoki ma ʻaneʻi. Nani nā maka o kēia pōpoki, ʻeā? ʻO ka mea maʻamau, ʻoi aku koʻu makemake o nā pōpoki wīwī ma mua o nā pōpoki ʻano momona. I koʻu manaʻo, nui loa ka nani o nā pōpoki wīwī me ka helehelena e like me ka huinakolu a me ka huelo lōʻihi a wīwī.

He pōpoki kāu? ʻAe? Laki nō ʻoe!

A hui hou!

Ka Mōʻī Wahine ʻo Seondeuk

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia mau lā?

Ua lōʻihi ka manawa i kākau ʻole ma ʻaneʻi. Ua paʻahana, moloā, a pēlā aku ..... E kala mai.

Eia kekahi pūkaʻina polokalamu kīwī aʻu i nānā ai i kēia mau pule aku nei. He polokalamu mōʻaukala Kōlea e pili ana ke ola o ka mōʻī wahine mua loa o Silla (신라 新羅). ʻO Silla (57 BC - 935 AD) kekahi aupuni mōʻī o Kōlea ma ka wā kahiko loa a ʻo Seondeok (선덕 善德) ka inoa o kēia mōʻī wahine. Aia 62 māhele a i ʻole 62 hola i kēia pūkaʻina polokalamu kīwī. ʻAno lōʻihi, ʻeā? Ua hōʻike ʻia kēia polokalamu ma ke kīwī ma Iāpana nei kekahi, akā, ua nānā au ma ka dēvīdē ma kahi o ke kīwī.

He pelaha o ka polokalamu

Ua maikaʻi ka hāmeʻe o ka mōʻī wahine ʻo Seondeok, akā, ʻoi aku koʻu makemake o ka hāmeʻe o ka ʻenemi o ka mōʻī wahine. ʻO Mishil (미실 美室) kona inoa a nui loa kona ʻino! No laila, i koʻu manaʻo, ua hoihoi ka hāmeʻe o Mishil.

ʻO Mishil

ʻO ka puolo wehena

He mau nānaina o ka māhele helu kanahākūmākolu

A hui hou!