Ke kamomila

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

Ua like kēia pua nani, ʻo ia hoʻi ke kamomila, me ka makalike.  Ua hoʻokumu ʻia ka inoa o ia pua nei mai ka inoa Helene kahiko χαμαίμηλον (khamaimēlon), ʻo ia hoʻi ka ʻāpala o ka honua mai nā huaʻōlelo ʻo χαμαί (khamai) ma ka honua a me μῆλον (mēlon) ʻāpala.

 

ʻŌlelo ʻia he ʻano lāʻau ke kamomila a inu ka poʻe i ke kī kamomila no ka hoʻopolapola ʻana a i ʻole no ka hoʻēmi ʻana i kekahi mau ʻano pāheu, ka ʻūpehupehu, ka ʻeha peʻa, ka hiaʻā, ka ʻōpū pūhā, ka uhahemo, a pēlā aku.  Nui nā huahana o ke kamomila e laʻa me ke kī, ka ʻaila, ke kopa, nā mea hoʻouʻiuʻi a me ke kopa lauoho.

 

Hiki nō hoʻi iā ʻoe ke hoʻokomo i kēia ʻano pua i loko o ka pōkē pua, ʻaʻole anei?

 

Nā pua

Nā pua

Nā pua maloʻo

Ke kī kamomila

Ke kopa kamomila

Ka pōkē kamomila

 

 A hui hou!

Nā Meaʻono Kepanī o Irodori

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

I kēia ahiahi, ua lawe mai kekahi haumāna aʻu i nā meaʻono Kepanī i ka papa.  Ua hele aku kona hoaaloha i Kyōto (京都) a ma laila i kūʻai mai ai i ka makana ma kekahi hale kūʻai kaulana i nā meaʻono Kepanī.  ʻO Irodori ka inoa o ia hale kūʻai o ka hui ʻo Tsuruya Yoshinobu (鶴屋吉信).

ʻO Kohakutō (琥珀糖) ka inoa o kēia ʻano meaʻono Kepanī i hana ʻia me ka limu (tengusa 天草) a me ke kōpaʻa.  ʻO ka ʻamepela ka manaʻo o kohaku (琥珀) a ʻo ke kōpaʻa ka manaʻo o tō (糖).  Ua like kēia meaʻono me ke kele ʻano paʻa me ka ʻili kōpaʻa.  ʻElima nā ʻono o kēia meaʻono, ʻo ia hoʻi, ka loke (ʻākala), ka pīkake (keʻokeʻo), ka poniʻala (poni), ka mineka (polū), ke kamomila (chamomile) (melemele).  Ua ʻai au i ka meaʻono loke a me ka meaʻono pīkake.  Ua ʻono, akā naʻe, ʻaʻole momona loa.

Ka lōkō o Irodori

Ka Hui Tsuruya Yoshinobu (鶴屋吉信)

Nā meaʻono kohakutō (琥珀糖 - kōpaʻa ʻamepela)

Ka meaʻono loke a me ka meaʻono pīkake

A hui hou!

Ka Hale Hōʻikeʻike o ka Poʻe ʻAmelika-ʻApelika

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

Ua heluhelu aʻe au e pili ana i ka wehena papahana o ka Hale Hōʻikeʻike Aupuni o ka Mōʻaukala a me ka Moʻomeheu o ka Poʻe ʻAmelika-ʻApelika ma Wakinekona Dēsē i kēia lā, ʻo ia hoʻi, ka lā 24 o Kepakemapa.  Ua haʻiʻōlelo ka Pelekikena Barack Obama i ua wehena papahana nei.  He māhele ka Hale Hōʻikeʻike Aupuni o ka Mōʻaukala a me ka Moʻomeheu o ka Poʻe ʻAmelika-ʻApelika o ka Hale Hōʻikeʻike ʻo Smithsonian.  Na David Adjaye i hakulau i kēia hale hōʻikeʻike hou.

Inā hele au i Wakinekona Dēsē i kekahi lā, makemake au e kipa aku i kēia hale hōʻikeʻike hou.  Nui koʻu hoihoi i ka mōʻaukala.

Ka Hale Hōʻikeʻike o ka Poʻe ʻAmelika-ʻApelika

Ka hale hōʻikeʻike ma ke ahiahi

Ka ʻili o ka hale hōʻikeʻike

Ka pelaha o ka wehena papahana

Haʻiʻōlelo ka Pelekikena Barack Obama

He alapiʻi lawe ʻōhua i loko

Nā kiʻi o ka mōʻaukala

He hale ʻuʻuku lāʻau

A hui hou!

ʻO ka Fitbit Charge HR

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

Ua hele au i Tenjin (天神) i kēia lā e kūʻai mai i ke ana hele wāwae maʻamau e like me ke ana hele wāwae aʻu i kūʻai mai ai ma kekahi mau makahiki aku nei no ka mea ua poloke ka mea kahiko ma ka mahina o Iune.  I koʻu komo ʻana i loko o ka hale kūʻai mīkini uila, ua nui ʻino nā ʻano uaki olakino e like me Fitbit.  Ua hoʻomaopopo au hoʻohana koʻu kaikuahine i kekahi Fitbit.  Ua haʻi mai ʻo ia he mea kūpono ia.  Ma hope o nā nīnau he nui i ka mea kūʻai aku, ua hoʻoholo wau e kūʻai mai i ka Fitbit Charge HR.  ʻEono nā waihoʻoluʻu.  Makemake ʻoukou i ka waihoʻoluʻu hea?  Ua kūʻai mai au i ka Fitbit Charge HR polū.

Me ka manaʻolana, hiki iaʻu ke hoʻomau e hele i ka hale hoʻoikaika kino i ʻekolu paha ʻehā paha manawa i kēlā me kēia pule.  Makemake au e hoʻēmi kino!  I kēia mau lā, he 71 kilokalame (ma kahi o 156 paona) koʻu kaumaha a he 180 kenimika (ma kahi o 6 kapuaʻi) koʻu lōʻihi.  Pilikia au i ka inu ʻana i ka pia.  Makemake au e inu i ka pia i koʻu ʻai ʻana i kekahi meaʻai ʻono loa.  Ua hoʻomaka koʻu ʻōpū e hele a ʻōluheluhe.  Auē!  He makana maikaʻi loa paha ka Fitbit Charge HR naʻu.

Kaʻu uaki olakino hou

Nani ka polū

Nui nā hana

Nā waihoʻoluʻu like ʻole

He mea nui ko kākou olakino.  I mua kākou pākahi a pau!

A hui hou!

Ka pane maiā Park Hyesin

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

Ma mua o koʻu hoʻi ʻana e hiamoe i ka pō nei, ua kākau au ma ʻaneʻi e pili ana i kekahi puʻukani Kōlea punahele aʻu, ʻo ia hoʻi ʻo Park Hyesin (백혜신).  Ma hope iho, ua hoʻoholo au e hoʻāʻo e ʻōʻioʻio iā ia me ka manaʻo o hiki ʻole ke loaʻa he pane.  Nui koʻu hilahila i ke kākau ʻana i ka memo ma ka ʻōlelo Kōlea, akā, ua hoʻouna aku iā ia.  A i kēia awakea, ua loaʻa ka pane maiā ia!  Hū ka pūʻiwa a me ka pīhoihoi!  He wahine kaulana ʻo ia a puka ʻo ia i ke kīwī, akā naʻe, ua pane mai ʻo ia iaʻu!  He wahine lokomaikaʻi ʻo ia, ʻaʻole anei.

백혜신 씨 고맙습니다. (Park Hyesin sshi gomapseumnida.)  E Park Hyesin mahalo nui loa.

 

Kaʻu pahu leka

Ka ʻōʻioʻio maiā Park Hyesin

Makemake au e hoʻouka i kekahi kiʻi hou o Park Hyesin.  He kiʻi kēia mai ka wikiō puolo ʻo 슈샤인 보이 (Shu Shain Boi) Keiki Hoʻohinuhinu Kāmaʻa.

Ke mele ʻo Keiki Hoʻohinuhinu Kāmaʻa

A hui hou!

Park Hyesin (박혜신)

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

Makemake paha ʻoukou i ka puolo a hoʻolohe i nā mele i kēlā me kēia lā.  ʻO au pū.  ʻAʻole au hoihoi i nā polokalamu kīwī Kepanī, no laila, ʻaʻohe aʻu kīwī.  ʻOi aʻe koʻu makemake i ka puolo.  ʻAʻole hiki iaʻu ke hoʻomau e ola me ka hoʻolohe ʻole ʻana i ka puolo.  Hoʻonuinui iki paha au i ka ʻōlelo.

Nui nā ʻano puolo aʻu e hoʻolohe ai e laʻa me ka puolo ʻAmelika, ka puolo Palani, ka puolo ʻInidonesia, ka puolo Wiekanama a keu aku i ka puolo Hawaiʻi a me ka puolo Kōlea.

I kēlā makahiki aku nei, i koʻu huli ʻana i kekahi mele Kōlea ma YouTube loaʻa ka wikiō puolo o Park Hyesin (박혜신) i ka papa wikiō ma ka ʻaoʻao ʻākau. ʻO Keopi Han Jan (커피 한 잔) ka inoa o ke mele.  ʻO ke kope, ʻo ia hoʻi ka meainu, ka manaʻo o keopi (커피), ʻo hoʻokahi ka manaʻo o han (한) a laila ʻo kīʻaha a i ʻole pola ka manaʻo o jan (잔).  No laila, ʻo Hoʻokahi Pola Kope ka manaʻo o kēia mele.

ʻO Park Hyesin kekahi puʻukani punahele aʻu. He leo halulu kona. Kūliʻu kona leo a hīmeni ikaika loa ʻo ia.  Ua hānau ʻia ʻo ia ma ka lā 21 o Pepeluali i ka makahiki 1982 ma ke kaona ukali o Seoul i kapa ʻia ʻo Gwangju (광주시, 廣州市) He 34 ona makahiki i ka makahiki nei.  I koʻu manaʻo, he wahine uʻi loa, ʻeā?

Hiki iā ʻoukou e huli i kāna mau mele ma YouTube ma ʻaneʻi.  Loaʻa kona mau ʻōʻioʻio ma ʻaneʻi.

Park Hyesin me ka lole ʻulaʻula

I loko o ke kaʻakōnelo

He kiʻi pāʻoihana

Ka wikiō puolo ʻo Hoʻokahi Pola Kope

Ka wikiō puolo ʻo Hoʻokahi Pola Kope

Ka wikiō puolo ʻo Hoʻokahi Pola Kope

Ka wikiō puolo ʻo Hoʻokahi Pola Kope

Ka wikiō puolo ʻo Hoʻokahi Pola Kope

Eia ke mele ʻo 커피 한잔 (Hoʻokahi Pola Kope)

커피 한잔을 시켜 놓고
그대 올 때를 기다려 봐도
웬일인지 오지를 않네
내 속을 태우는구려

팔분이 지나고 구분이 오네
일분만 지나면 나는 가요
정말 그대를 사랑해
내 속을 태우는구려

오 그대여 왜 안 오시나
오 내 사랑아 오 기다려요
불덩이 같은 이 가슴
엽차 한잔을 시켜 봐도
보고싶은 그대 얼굴
내 속을 태우는구려

오 그대여 왜 안 오시나
오 내 사랑아 오 기다려요
불덩이 같은 이 가슴
엽차 한잔을 시켜 봐도
보고싶은 그대 얼굴
내 속을 태우는구려

  
A hui hou!