ʻO Gianis

Aloha mai nō kākou e nā makamaka heluhelu a me koʻu mau hoaaloha. Pehea mai nei ʻoukou i kēia lā?

Ua ʻimi mai au i kekahi ʻatikala hoihoi ma Yahoo i kēia lā, a ua nānā au i kekahi wikiō e pili ana i ka ʻaikalima ma ʻĪnia. ʻAʻole au i hele i ʻĪnia i kēia manawa, akā, nui koʻu makemake i ka meaʻai ʻĪnia a me ka puolo ʻĪnia! I koʻu nānā ʻana i ia wikiō, ua hoʻohele au he kumuhana hoihoi ka ʻaikalima ʻĪnia no kēia puke moʻomanaʻo pūnaewele aʻu.


ʻO Gianis ka inoa o kēia hui ʻaikalima. Eia ka loulou o ke kahua paʻa ma ʻaneʻi. I koʻu manaʻo, ʻaʻole hana maikaʻi ʻia ke kahua paʻa, no ka mea, liʻiliʻi nā kiʻi o nā ʻaikalima. Ua ʻōlelo ʻia ma ka wikiō ua hoʻokumu ʻia ʻo Gianis ma kanalima makahiki aku nei ma New Deli a i kēlā manawa ua hana ʻo Gianis ai i kekahi meaʻono ʻĪnia kuʻuna, akā, ʻaʻole maopopo pono iaʻu ka inoa o ia meaʻono. Ua ʻōlelo ʻia ma ka wikiō aia kekahi au emi ma ka honua i kēia manawa, akā, nui nā mea kūʻai o nā ʻaikalima ma Gianis. I kēlā makahiki aku nei, aia ʻeiwa hale kūʻai ʻo Gianis a i kēia makahiki, aia iwakāluakūmāhā hale kūʻai! Aia ʻumikūmālima hale kūʻai hou i hoʻokahi makahiki wale nō! Ke hoʻāʻo nei au e ʻai i nā meaʻai hāʻehuola ma hope mai o ka hopena o ka hoʻomaha kauwela, akā, inā hiki, makemake au e ʻai i kekahi ʻaikalima ma Gianis! E ʻai ana au i ka ʻaikalima kuʻuna ma laila!

Ua loaʻa iaʻu kēia kiʻi ma ke kahua paʻa! ʻOno au i ka ʻaikalima i kēia manawa...

Laki maikaʻi iā Gianis!

A hui hou! ka ʻōlelo Hawaiʻi the Hawaiian language

Ka hua moa sesame

Aloha mai nō kākou e nā makamaka heluhelu a me koʻu mau hoaaloha. Pehea mai nei ʻoukou i kēia lā?

Ua loaʻa iaʻu kēia meaʻono mai kekahi haumāna aʻu i kēia lā! He makana mai Tōkyō kēia, a ʻaʻole hiki ke kūʻai ʻia mai ma Fukuoka nei. He mea minamina kēia, no ka mea, nui ka ʻono o kēia meaʻono kaulana! He aha lā kēia meaʻono? ʻO ごまたまご goma tamago ka inoa a ʻo semame ka manaʻo o ごま goma a ʻo hua moa ka manaʻo o たまご tamago.

Hoʻokahi hua moa sesame me ka wahī pepa

A e nānā kākou iā loko o kēia meaʻono. Aia ke kokoleka keʻokeʻo ma waho, ka meaʻono ma loko a ka mea hoʻopipili sesame ʻeleʻele ma ka waena o ka meaʻono.

Eia ʻelua hua moa sesame. Like ʻo waho me ka hua moa, akā, like ʻo loko me ka meaʻono.

A pehea lā ka ʻono o kēia meaʻono? ʻĒēēēē! ʻO ka palekaiko! Inā hele koʻu hoaaloha i Tōkyō, e noi ʻoe i kēia meaʻono. Kūʻai ʻia ʻo Goma Tamago ma ke kahua mokulele ma Tōkyō! Inā ʻaʻole hiki iā ʻoe ke kali, eia ka loulou o ka hui. Ua heluhelu au i ke kahua paʻa i kēia manawa aia hoʻokahi haneli a me ʻekahi ikehuʻā i hoʻokahi hua moa sesame. ʻAno pipi, akā, he mea hāʻehuola ka sesame ʻeleʻele, ʻaʻole anei? A pehea ke kokoleka keʻokeʻo? He mea hāʻehuola ke kokoleka keʻokeʻo? Inā ʻai i hoʻokahi hua moa sesame, ʻaʻole pilikia! Hoʻokahi haneli a me ʻekahi ikehuʻā wale nō! Akā, hiki lā iā wai ke ʻai i hoʻokahi wale nō?! ʻAe, he nīnau maikaʻi kēia.

ʻO ka piopio sesame ʻeleʻele. E huli iā ia ma Tōkyō!

Mahalo e Kelue i kēia meaʻono aʻu e makemake nui ai!

A hui hou!

He ʻaina awakea māmā

Aloha mai nō kākou e nā makamaka heluhelu a me koʻu mau hoaaloha. Pehea mai nei ʻoukou?

ʻO ka mea maʻamau, ʻai au i ka laiki ma ka hale. I koʻu hele ʻana i ka mākeke nui i nehinei, ua ʻike au i nā māpina ʻEnelani a ua ʻono au i kēia palaoa o kuʻu wā kamaliʻi. I kēia awakea, ua hoʻopāpaʻa i ia māpina. I ka manawa o koʻu kuke ʻana i ka pekona, ua holoi au i ka lekuke a me ka ʻōhiʻa lomi. Ua waiho au i nā mea a pau a luna o ka māpina pāpaʻa a kāpī i ka pepa a me ka paʻakai. ʻAʻole au i hoʻohui i ka meoneki, no ka mea, inā hiki, makemake au e ʻai i nā meaʻai hāʻehuola. ʻĀ! Pololei! ʻAʻole hāʻehuola loa ka pekona, akā, ua ʻai au i ʻelua pāpaʻa pekona wale nō, a ua hoʻokāwele au i ka ʻailakele ma mua o ka hoʻohui ʻana i ke kanauika.

Eia ka māpina

A eia ke kanauika me ke kī

I kēia ʻaina awakea, ua hana au i kīʻaha kī piki. Ua ʻano momona ke kī, akā, ua ʻono hoʻi me ke kanauika! I koʻu nānā ʻana i kēia mau kiʻi, pōloli hou au.

A hui hou!

Ke alelo kiapolō

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Naʻu i hoʻonui i ʻehā kilokalame i koʻu kino i kēia hoʻomaha kauwela o kēia makahiki, no ka mea, ua hele au me koʻu mau hoaaloha no ka ʻai ʻana a ka inu pia ʻana ma ka hale ʻaina i ʻekolu a i ʻole ehā manawa i hoʻokahi pule! Nui koʻu leʻaleʻa, akā, pono au e hoʻēmi kino i kēia mahina! Auē!

Kaulana kēia meaʻai ʻo ke alelo kiapolō ma Iāpana nei. He 蒟蒻 konnyaku ka huaʻōlelo Kepanī no ke alelo kiapolō a he meaʻai kuʻuna kēlā. I kēia mau makahiki, nui ka poʻe e ʻai nei i ke alelo kiapolō. No ke aha lā? Aia nā ʻeono ikehuʻā wale nō ma hoʻokahi haneli kalame! He meaʻai maikaʻi no ka hoʻēmi kino ʻana a ʻaʻole pipiʻi! Ua uku aku au i kanaiwakūmāwalu kālā Kepanī (hoʻokahi kālā ʻAmelika) no hoʻokahi pūʻolo!

Ka pua alelo kiapolō

He aha ke alelo kiapolō? He mea kanu kēlā me kekahi pua ʻano ʻē a hana ʻia ka mole o kēia mea kanu i kekahi ʻano kele. ʻAi au i nā nulu alelo kiapolō e like me ka pakeki i ka ʻaina ahiahi. He ʻono. ʻAʻole nui nā ikehuʻā, akā, nui ka hāʻaʻa ʻai. ʻO ka mea nui, ma hope o koʻu ʻai ʻana i ke pā nulu alelo kiapolō, māʻona au! Akā naʻe, makemake au e ʻai i meaʻono ma waho o nā nulu alelo kiapolō! Auē! No ke aha nui ai nā ikehuʻā i nā meaʻono, a liʻiliʻi nā ikehuʻā i nā meaʻai e like me ke alelo kiapolō?

He pūʻolo nulu alelo kiapolō

He mau nulu alelo kiapolō

A hui hou!

Ke kī kanakēʻeleʻele

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Nui koʻu makemake i ke kī a inu au i nā kīʻaha he nui i kēlā me kēia lā ma ka hana a ma ka hale. He kī kaulana ke kī ʻōmaʻomaʻo. Nui nā ʻano kī ʻōmaʻomaʻo ma Iāpana nei, akā, nui nā ʻano kī ʻē aʻe. Nui nā hale kūʻai kī kekahi. ʻAʻole au inu i ke kope a ʻaʻole au makemake i ka ʻaʻala o ke kope.

I kuʻu wā kamaliʻi ma Nūioka, ua kūʻai mai koʻu Pāpā i ke kanakēʻeleʻele i kekahi manawa a ʻai ʻo ia me ka minoʻaka nui. He keiki nīele au, no laila, ua makemake koke au e hoʻāʻo i kēlā kanakē ʻano ʻē i hōʻoluʻolu i koʻu Pāpā. I koʻu nahu ʻana iho i ke kanakēʻeleʻele, ua manaʻo au 「Auē! He kanakē lā kēia? He kanakē kēia na nā kānaka mākua wale nō!」 Ma hope iho, ʻaʻole au i ʻai a i ʻole hoʻāʻo hou i kēlā kanakē i ka wā o kanakolu makahiki!


Akā naʻe, i kekahi lā i kekahi mau mahina aku nei, ua hāʻawi mai kekahi haumāna aʻu iaʻu i pahu kī kanakēʻeleʻele! Ma mua o koʻu hoʻāʻo ʻana aʻe i ke kī, ua ʻōlelo mai iaʻu iho 「ʻAʻohe kope! Makemake au i nā kī a pau, no laila, ʻaʻole pilikia. ʻOno paha.」 Ua hana au i kīʻaha kī kanakēʻeleʻele i mākaukau i ka kiloi ʻana i ia kī. I koʻu pūʻiwa, nui ka ʻono o ia kī! Nui koʻu makemake o kēia kī hou!

ʻĀ! Ma hope o kanakolu makahiki, ua lilo paha au i kanaka makua.

ʻO Trans-herb ka inoa o ka hui e hana nei i ia kī. He hui Kanakā. Eia ka loulou o ka hui.

A hui hou!

ʻO Michael Newton

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

I nā makahiki a pau, hoʻouna ʻia au i makana lā hānau e koʻu ʻohana ma ʻAmelika. E like me ka mea maʻamau, ua makemake au i nā puke i kēia makahiki kekahi! ʻŌlelo mau au i koʻu kaikuahine i nā inoa o nā puke i makemake ai a ma hope o kekahi mau pule, loaʻa iaʻu ka pahu nui i piha i nā puke mai ʻAmelika. Ke kali i ka pahu puke, pīhoihoi mau au! Eia kekahi puke i loaʻa ai i kēia makahiki. Ua ʻike mua au i ka mea kākau o kēia puke, nō hoʻi ʻo Michael Newton ma ka nīnauele ma YouTube i koʻu ʻimi ʻana i nā wikiō e pili ana i ka hānau wawā. He kumuhana hoihoi ka hānau wawā.


He kauka ʻo Michael Newton a ua noiʻi ʻo ia no ka hānau wawā. I kēia puke, hiki iā kākou ke heluhelu e pili ana i ka wā ma waena o ka make a me ka hānau wawā. Hoihoi nō! Inā hiki, makemake au e kākau ma ʻaneʻi i ka mea o loko o ka puke, akā, paʻakikī loa noʻu. He minamina paha. E heluhelu ʻoukou i ka puke!


A hui hou!

Ka pāheona Malaisia

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Ua lōʻihi loa kaʻu hāmau ma kēia puke moʻomanaʻo pūnaewele! Auē! Ua kākau iho au ma ʻaneʻi ma ka lā ʻehā o Kepakemapa aku nei. Ua hala hoʻokahi makahiki! Ua lōʻihi loa! Nui koʻu paʻahana a nui loa koʻu moloā, no laila, ʻaʻole au i kākau aʻe. ʻAʻole maikaʻi kēia.

Makemake au e hoʻouka i kekahi kiʻi i kēia pō. Ma mua, pono au e huli i ia kiʻi ma kaʻu kamepiula.


Eia ke kiʻi. I kekahi lā, ua loaʻa iaʻu kēia kiʻi ma ka pūnaewele i koʻu kele ʻana. Ua kaha ʻia kēia kiʻi e ka mea pāheona Malaisia. ʻO wai lā kona inoa? ʻAʻole au i kākau i ka memo a ʻaʻole au i ʻike pono. Makemake au i nā waihoʻoluʻu o kēia kiʻi a me ka lau.

A hui hou!

Chinsukō

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Chinsukō

I ko‘u hele ‘ana i ka hale pule ma mua o ka hana i kēia kakahiaka, ua hui au i ka makuahine o kekahi haumāna a‘u a ua hā‘awi mai ‘o ia ia‘u i kekahi mau makana o kāna huaka‘i i Okinawa. Kama‘āina ‘oukou i ka mea‘ono kuki chinsukō? He mea‘ono kuki ku‘una ma Okinawa ka chinsukō. ‘O ka mea ma‘amau, kākau ‘ia ka chinsukō ma ka huahakalama hiragana ちんすこう, akā, aia nā hō‘ailona Kepanī kekahi - 金楚糕. ‘A‘ole hiki paha i nā Kepanī ke heluhelu i kēia mau hō‘ailona, no ka mea, kākau mau ‘ia ka inoa ma ka huahakalama hiragana e like me luna. Makemake loa au i nā chinsukō a ua ‘ai i nā manawa he nui, akā, ‘a‘ole hā‘ehuola paha kēia mea‘ono kuki Okinama, no ka mea, haku ‘ia me ka ‘aila pua‘a. ‘A‘ole pilikia! Nui ka ‘ono!

E Seki San, mahalo i nā makana!

A hui hou!

Kekahi pāheona na Jamini Roy

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Ua heluhelu ‘oukou i ka‘u ho‘olaha e pili ana iā Jamini Roy i nehinei? Eia ka pāheona kaulana loa na Jamini Roy ma ka Hale Hō‘ike‘ike o ka Pāheona ‘Ākia ma Fukuoka. Makemake loa au i kēia ki‘i a hiki ia‘u ke hele i ka hale hō‘ike‘ike e nānā i kēia ki‘i wale nō! Nani ka melemele! Nōhie ke kaila.

Keiki kia

Inā hele mai ‘oukou i Fukuoka, e hele aku e nānā i kēia ki‘i!

A hui hou!

Jamini Roy

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Kama‘āina ‘oukou i kēia mea pāheona Penekala (Bengali) mai Kalekuka (Calcutta), ‘Īnia? ‘O Jamini Roy a i ‘ole যামিনী রায় ma ka ‘ōlelo Penekala kona inoa. Ua ola ‘o ia mai nā makahiki 1887 a hiki i 1972. Ma nā makahiki kanakolu, ua ho‘omaka ‘o Jamini Roy i ke kaila hou. He kaila maka mua a me he kaila ‘Īnia ho‘i nō kona kaila.

Makuahine a me keiki

‘Ekolu wahine i noho iho

Pipi me keiki

Pōpoki me keiki

‘O Parvati lāua ‘o Ganesha

Ua kipa aku au i ka Hale Hō‘ike‘ike o ka Pāheona ‘Ākia ma Fukuoka nei i ‘ewalu makahiki aku nei a ua ‘ike mua i kekahi mau pāheona na Jamini Roy. Nui ko‘u makemake o kāna mau pāheona no ka mea, nani loa nā waiho‘olu‘u a ikaika loa nā kaha hulu pena. ‘Ano like kāna mau pāheona me nā mea i ki‘i ‘ia e nā keiki, akā, makemake au i kēia kaila! ‘Oi aku ka nani a me ka hoihoi o kāna mau pāheona ma mua o kā Picasso mau pāheona. I kekahi lā, inā hiki, makemake au e kū‘ai mai i kekahi pāheona na Jamini Roy. ‘Ā! Mai poina! ‘O ka lā ‘umikūmāono o Iulai ko‘u lā hānau... He ‘ōlelo ho‘ohani kēia i ko‘u mau hoaaloha a pau. Ua kū‘ai mai au i nā kāleka po‘oleka a pau ma ka Hale Hō‘ike‘ike o ka Pāheona ‘Ākia, no laila, makemake au i kekahi kope kumu!

A hui hou!

He aloha...

Aloha mai nō kākou e nā makamaka heluhelu a me ko‘u mau hoaaloha. Pehea mai nei ‘oukou?

Ua nui ka‘u hana a moloā loa au, no laila, ‘a‘ole au i kākau ma ‘ane‘i. ‘A‘ole hoihoi, ‘eā? Ua hele au i ka hale kū‘ai sēdē ‘o Tower Records ma Fukuoka nei a ua kū‘ai mai i kēia sēdē na Cody Pueo Pata. Makemake au i kona leo. Ke ho‘olohe nei au i kēia sēdē i kēia manawa. Makemake au i ke mele ‘o Ku‘u Home. Eia nā hua‘ōlelo o ke mele:

Ku‘u Home

na Cody Pueo Pata

He aloha kēia no ku‘u ‘āina

No ku‘u home, Maui nō ka ‘oi

Māhiehie Haleakalā
Ke kuahiwi ‘oi kelakela

Lei onaona, lei lokelani

Lei launa ‘ole i ka‘u ‘ike

‘A‘ohe lua e like ai

Me kou nani poina ‘ole

Puana ke aloha no ku‘u ‘āina

No ku‘u home, Maui nō ka ‘oi

E Cody, mahalo i kēia mau mele!

A hui hou!

'O Welina

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Makemake au e kākau ma ‘ane‘i i kēlā me kēia pule, akā, pa‘ahana nā lā a pau. E kala mai ia‘u.

Ua heluhelu au i kēia puke na Malcolm Nāea Chun i kēlā pule aku nei. Makemake au e kū‘ai mai i kekahi mau puke i kēia mo‘o puke ‘o Ka Wana. Eia ke kahuapa‘a.

A hui hou!

Ke kākāpō

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Kama‘āina ‘oukou i ke kākāpō? Ua kāinoa au i kekahi mau puke e pili ana i Aotearoa a me ka mo‘omeheu Māori i kēlā hopena pule aku nei. ‘O The Story of the Kākāpō, Parrot of the Night na Philip Temple kekahi puke.

Ua heluhelu au i kēia puke kamali‘i me ka hoihoi. ‘A‘ole au i ‘ike i nā mea he nui o Aotearoa, a ‘a‘ole au i ‘ike no ke kākāpō nō ho‘i. He manu ‘ane halapohe o Aotearoa ke kākāpō.

Eia he wikiō no ke kākāpō ma ‘ane‘i.

A hui hou a e ola mau ke kākāpō!

'O Namdaemun i puhi 'ia

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Ua heluhelu au i ka nū hou e pili ana i ke puhi ‘ana i ke ahi o 남대문 Namdaemun i Seoul ma Kōlea Hema. Aloha ‘ino! ‘O Namdaemun kekahi hō‘ailona mō‘aukala o Kōlea a he mea makamae aupuni. Ua kūkulu ‘ia ma ka makahiki 1398. Ua ‘ōlelo ke kalaiwa i Seoul ua nānā ‘o ia i kekahi kāne i komo aku i loko o Namdaemun. He puhi mana‘o ‘ino paha. Aloha ‘ino! Minamina nō!

ma mua

ma hope

Aloha ‘ino!

Ko'u Mahuka 'Ana I Ka Hale Waihona Puke

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Nui ko‘u pa‘ahana i nā lā a pau, akā ‘o Pepeluali ka mahina pa‘ahana loa, no ka mea, ‘o Malaki ka hope o ka makahiki keu kula ma ‘ane‘i a pono au e ho‘omākaukau nui. Pono au e haku i nā hō‘ike kau hope i kēia hopena pule. He hana nui kēia, no ka mea, haku au i ka hō‘ike a me ka līpine me nā mo‘olelo a me nā nīnau ma ka ‘ōlelo Pelekāne. Auē! Ua hana au no ‘umikūmālima hola, a ‘a‘ole pau i kēia manawa.

I kēia lā, ua makemake au e mahuka mai ko‘u haku ‘ana i nā hō‘ike, no laila, ua hele aku au i ka hale waihona puke no ka ho‘opa‘a ha‘awina ‘ana i ka ‘ōlelo Hawai‘i. Inā noho au ma ka hale, hana au. Ua hiki au i laila ma ka hola ‘umi a ua ho‘opa‘a ha‘awina a hiki i ka hola ‘umikūmālua, a laila, ua ‘ai ma ka hale ‘aina o ka hale waihona puke. ‘Ono kēia hale ‘aina a ‘a‘ole pipi‘i loa. Ua uku aku au i 650 kālā Kepanī i kēia ‘aina awakea.

Ma hope o ka ‘aina awakea, ua ‘ano māluhiluhi au a nānā i nā puke. Auē! Nui nā puke hoihoi, akā pa‘ahana au i kēlā me kēia lā. Ua kāinoa au i nā puke no Aotearoa a me ka mo‘omeheu Māori.

A hui hou!

'O Nā Mele O Hawai'i Nei

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Nui ko‘u hana i kēia mau lā! Makemake au e heluhelu puke, akā pa‘ahana mau! Na‘u i ho‘omaka i kēia puke ‘o Nā Mele o Hawai‘i Nei i ‘ekolu pule aku nei a ho‘opau i ka pō nei. ‘A‘ole kēia he puke lō‘ihi. Aia ho‘okahi haneli ‘umi ‘ao‘ao wale nō. Heluhelu au ma mua o ko‘u hiamoe ‘ana, akā, māluhiluhi nō au, a hiamoe koke au! Auē!

Pa‘akikī nā mele, ‘a‘ole anei? ‘A‘ole maopopo maika‘i ia‘u. Makemake au i kēia mele na Makua Laiana:

Hawai‘i Aloha

E Hawai‘i, e ku‘u one hānau e,

Ku‘u home kulaīwi nei,

‘Oli nō au i nā pono lani e.

E Hawai‘i, aloha e.

Hui

E hau‘oli nā ‘ōpio o Hawai‘i nei

‘Oli e! ‘Oli e!

Mai nā aheahe makani e pā mai nei

Mau ke aloha, nō Hawai‘i.

E ha‘i mai kou mau kini lani e,

Kou mau kupa aloha, e Hawai‘i.

Nā mea ‘ōlino kamaha‘o nō luna mai.

E Hawai‘i, aloha e.

Nā ke Akua e mālama mai iā ‘oe,

Kou mau kualono aloha nei,

Kou mau kahawai ‘ōlinolino mau,

Kou mau māla pua nani e.

A hui hou!

Pelena Laiki Kāli

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Makemake au i ka pelena laiki, a makemake au i ke kāli, no laila, makemake nui loa au i kēia pelena laiki kāli maiā Kameda! Ke ho‘opa‘a ha‘awina au, makemake au e ‘ai i kekahi mea. ‘Ai au i nā hua‘ai i ka hapanui o ka manawa--‘āpala, pea Kepanī, ‘ālani Pākē, akā i kekahi manawa, ‘ai au i ka pelena laiki. Hiki ia‘u ke ‘ai i ho‘okahi ‘eke pelena laiki kāli i nā lā a pau! ‘Ono nō!

A hui hou!

Ka'u Hualono

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Eia kekahi mau ki‘i o ka‘u hualono i kū‘ai mai i kēlā makahiki aku nei i ko‘u lā hānau. Ua maika‘i loa kēia makana hānau, ‘a‘ole anei? Nui nā Hualono ‘o Ipod ma Iāpana nei, akā ua makemake nui au i ke kaila o kēia hualono i ko‘u nānā ‘ana. ‘O iriver ka inoa o kēia hui Kōlea. Ua kū‘ai mai au i ka X20! A nui ka papakaumaka! Hiki ia‘u ke nānā i nā wikiō ma ka‘u hualono! Ua ho‘oili ‘ē au i nā mele Hawai‘i he nui! Aia nā ‘ehā ‘ai pāpiliona, no laila, hiki ke ho‘oili i he 960 mele! A inā ho‘okomo au i ke kāleka SD, hiki ia‘u ke ho‘oili i he 1,900 mele! Auē! Pono au e kū‘ai mai i sēdē hou!

Ka hualono me kekahi kāleka SD.

A hui hou!

Ko Haunani Lei

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Nani nā lei o Hawai‘i, ‘eā? Aia ka hō‘ike hula o kekahi mau hoaaloha o‘u i ka lā ‘āpōpō ma Momochi a ua noi kekahi hoaaloha ia‘u e haku i kona lei. Nui ko‘u hana i kēia hopena pule, akā ua ‘ae au i ka haku ‘ana i ka lei. I ka ‘auinalā, ua hele māua ‘o Haunani a kū‘ai mai i nā pua. Ua makemake ‘o Haunani e kū‘ai mai i nā ‘okika ‘ākala, akā ma hope o ‘ekolu hola o ka ‘imi i nā ‘okika ‘ākala ma kekahi mau hale kū‘ai pua, ua ho‘oholo māua i nā ‘okika ‘ula‘ula. Ua nui nā pua ‘ākala ma‘amau ma nā hale kū‘ai pua -- nā loke, nā pua hōlani, nā poni mō‘ī, nā pī wai anuhea, akā ‘a‘ohe ‘okika ‘ākala! Auē!

Eia nā ‘okika ‘ula‘ula.

Eia kekahi ki‘i o nā ‘okika ‘ula‘ula. Nani nō!

A eia ka lei kui pololei.

Ua haku au i lei kui lau kekahi.

A eia kekahi ki‘i i pa‘i ‘ia a kokoke o ka lei kui lau.

A hui hou!

Ke kī līkao Wiekanama

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Ua ho‘ā‘o ‘oukou i ke kī līkao Wiekanama? ‘Ano like me ke kī pīkake. Makemake nui ko‘u kaikuahine ‘o Penikō i ke kī a ua ‘ōlelo au iā ia no ke kī Wiekanama, akā ‘a‘ole ‘o ia kama‘āina. E ‘imi ana au i ke kī līkao ma Fukuoka nei a ua loa‘a kekahi hale kū‘ai Wiekanama ia‘u i kēlā pule aku nei! Ua komo koke au a kū‘ai mai i ‘elua ‘eke kī līkao i kēia lā. Ma hope o ko‘u ho‘i ‘eleu ‘ana mai i ka hale, ua hana au i kī‘aha kī līkao. Ua ‘ono nō! Pono au e ho‘ouna i kekahi ‘eke i ko‘i kaikuahine i kēia pule a‘e.

Nani ka līkao!

A hui hou!

Ka Lei O Hawai'i

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Kama‘āina anei ‘oukou i kēia puke na Marie A. McDonald? ‘Ano kahiko nā ki‘i o kēia puke, akā manomano ka ‘ike iā loko! Makemake nui au i ka lei Hawai‘i, akā ‘a‘ole maopopo maika‘i ia‘u. Nui nā ‘ano pua! Nui nā inoa! Auē! Pono au e ‘imi i nā ki‘i o nā pua ma ka Pūnaewele Puni Honua. Makemake au e kākau li‘ili‘i i ka ‘ike e pili ana i ka lei Hawai‘i ma ‘ane‘i. Hoihoi nō, ‘eā? E ‘Anakē Leilehua, mahalo nui loa i kēia puke!

‘O Marie Emelia Leilehua McDonald

A hui hou!

Nā Pule Kahiko

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Ua kaulana kēia puke na June Gutmanis? Pēlā paha. Ua ho‘opau au e heluhelu i kēia puke i kēlā pule aku nei. Ua hoihoi nā pule kahiko, akā nui ka pa‘akikī! Auē! Pono au e ho‘opa‘a i nā hua‘ōlelo he nui, inā maopopo ia‘u nā pule a i ‘ole nā mele kahiko.

Eia kekahi pule e ho‘opau i ka ua mai kēia puke.

Mālie
Mālie ka ua i Pōhākea
Ma kai he ua
Ma uka he ua
Kiola
Kiola ka ua i kou luawai

A hui hou!

Kōsui Nashi - Ka Pea Wai Hau'oli

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

Ua ho‘omaka ka hā‘ulelau ma Iāpana nei, a ‘o ka hāʻulelau ka‘u kau punahele! ‘Ono loa ka mea‘ai i kēia manawa o ka makahiki! Ke mana‘o au i ka hā‘ulelau, makemake au e ‘ai i pea wai hau‘oli (幸水梨 kōsui nashi ma ka ‘ōlelo Kepanī. 幸 kō hau‘oli, 水 sui wai, 梨 nashi pea). Like ka pea Kepanī me ka ‘āpala, a ‘a‘ole like me ka pea haole. Nui ka wai o ka pea wai hau‘oli a nui ka ‘ono i ka inu ‘ana i ke kī ‘ōma‘oma‘o!

E ihi ana au i pea wai hau‘oli i kēia manawa, akā ma mua pono au e hana i kī‘aha kī ‘ōma‘oma‘o!

A hui hou!

He Ho'olaule'a Hou Ma Fukuoka?

Aloha mai nō kākou e nā makamaka heluhelu a me nā hoaaloha. Pehea mai nei ‘oukou?

‘A‘ole au i ‘ike i kēia ho‘olaule‘a hou ma Fukuoka. ‘O Ka Ho‘olaule‘a O Hakata Tōmyō ka inoa. Ua nīnau au i ka‘u mau haumāna i kēia lā, akā ‘a‘ole kaulana kēia ho‘olaule‘a. Ua makemake au e hele i laila, akā pau ka ho‘olaule‘a i nehinei a ua lohe e pili ana i kēia hanana i kēia lā nō! Auē. Pono au e kali i kēia makahiki a‘e! 365 lā? 364 lā? He aha ke ‘ano o ho‘olaule‘a kēia? ‘A‘ole au ‘ike pono akā, he ho‘olaule‘a o ka pāheona i hana me nā kukui lākene.

Eia kekahi mau ki‘i:

A hui hou!