Ka Pai Pika

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

Makemake ‘oukou i ka pai pika? Ua kauoha au i ka pai pika i kēia pō!



‘O Pizza Pockets (Nā Pākeke Pika) ka inoa o ka hale ‘aina. Nui nā hale ‘aina Nā Pākeke Pika ma Iāpana nei. He kanakolukūmākolu hale ‘aina Nā Pākeke Pika ko Fukuoka nei!

Ua makemake au e ‘ai i ka pai pika hou.

‘O Ka Mō‘ī O Ke Ke‘a ka inoa o kēia pai pika, no ka mea, aia ‘ehā hapahā (A, B, C, D). Ua uku au i 1,150 kālā Kepanī no ka pai pika o 25 kenimika. Ua ‘ano kelekele ia, akā ‘a‘ole au i makemake e kuke i kēia pō. E ‘aiaola ana au i ka lā ‘āpōpō!

A hui hou!

Ka Mea'ono I'a Kepanī

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

He aha kēia?

He mea‘ono i‘a Kepanī me ka waiūpa‘a kēia. チーズ chīzu = waiūpa‘a かまぼこ kamaboko = mea‘ono i‘a Kepanī.

Eia ka ‘ikepili kūlana ‘aiaola no ho‘okahi mea‘ono i‘a (30 kalame):

• ikehu‘ā .................................... 35 ikpk.
• polokina .................................. 2.7 kal.
• ‘ailakele .................................. 0.8 kal.
• kōpia ....................................... 4.4 kal.
• sodiuma .................................. 246 mkal.
• kalipuna .................................. 138 mkal.

He mea‘ai hā‘ehuola ia? ‘A‘ole au ‘ike maika‘i, akā he ‘ai māmā maika‘i.

A hui hou!

'O Omā

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

He hale ‘aina hou ma Daimyo kēia.

‘O お万阿 Omā ka inoa o kēia hale ‘aina sushi.

He aha ka hua‘ōlelo sushi ma ka ‘ōlelo Hawai‘i -- ka laiki wīneka, ka laiki wīneka Kepanī? He hale ‘aina ‘ano ‘ē ‘o Omā, no ka mea, aia ka laiki wīneka a me ka 小籠包 shōronpō (ka mea‘ai Pākē; ‘a‘ole au ‘ike i ka puana Pākē. ‘O xiǎo lóng bāo ka puana Pākē? Pēlā paha! ‘O shōronpō ka puana Kepanī kēia.). Ua hele au e ‘ai i ka shōronpō. Ua kauoha au i ka ‘aina awakea. Aia ka laiki wīneka, ke kupa, a me ‘ekolu shōronpō. Ua ‘ono loa nā shōronpō, akā ‘o ka ‘ono ma‘amau ka laiki wīneka o kēia hale ‘aina.

E kala mai! ‘A‘ole au i pa‘i i ke ki‘i o ka shōronpō, no laila, ua pōloli nō au a ua ‘ai koke!

A hui hou!

Ke Kī 'Ōma'oma'o Maedaen

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

‘Ā! Makemake lua ‘ole au i nā kī like ‘ole! Aia ke kī ‘ōma‘oma‘o Kepanī, nā kī Pākē, nā kī Pelekāne a me nā kī mai Kōlea, ‘Īnia, Sililanaka, Taiuana, a pēlā wale aku. ‘Ā! Mai poina kākou i ke kī kaulana mai ‘Apelika Hema. ‘Ae, makemake lua ‘ole au i nā kī! A i ke kope? ‘A‘ole! ‘A‘ole au inu i ke kope.

Eia kekahi kī ‘ōma‘oma‘o a au i kū‘ai mai ai

ma ka hale kū‘ai kī 前田園 Maedaen.

Eia ka pū‘olo kī.

He mau lau kī.

Ua mākaukau ke kī, akā ‘a‘ole nani loa ka waiho‘olu‘u o kēia kī. ‘A‘ole ‘ōma‘oma‘o ka waiho‘olu‘u, akā melemele nō. He kī‘aha kī Pākē kēia. Ua kū‘ai mai au i kēia kī‘aha kī Pākē ma Kōlea no ke kī Kepanī! Kau‘āina, eā!

A hui hou.

'O Ka Hola 'Ehia Kēia?

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

‘O ka hola ‘ehia kēia? Ua mana‘o mau au i kēia nīnau. He uaki ka‘u, akā he uaki ha‘uki ia. Komo au i ka pa‘alole a me ka lei ‘ā‘ī i nā lā a pau mai ka Po‘akahi a hiki i ka Po‘alima, no laila, he uaki kūpono ‘ole kēia uika ha‘uki no kēia mau ‘a‘ahu. Ua ho‘oholo au e kū‘ai mai i ka uaki hou, akā e ‘imi ana au i ‘eono mahina ma nā hale kū‘ai like ‘ole o Fukuoka nei a ‘a‘ole i makemake au i nā uaki. I kekahi lā, ua ‘ike au i kekahi uaki nani, akā pipi‘i nō. Auē! Aloha ‘ino! ‘Ae, nani ka uaki, akā pipi‘i nō. Ua ho‘oholo au e kali iki. Ua hele au i ka hale kū‘ai i Kepakemapa a aia ke kū‘aiemi! Laki nō au! Ma hope o kekahi mau mahina, ua kū‘ai mai au i ka uaki nani. Makemake au i kēia uaki hou a ‘a‘ole mana‘o au i ka nīnau "‘O ka hola ‘ehia kēia?" i kēia manawa. ‘A‘ole he Rolex ka‘u uaki hou, akā pololei ia a makemake au i ke kaila. Kaulana ‘o Seiko ma ka honua? ‘A‘ole au ‘ike, akā kaulana nō ia i ka pololei ma Iāpana nei.

Ku‘u uaki hou

A hui hou.

Ke Kipi 'Uala Kahiki Hawai'i

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

Aia ka pā‘ina chijimi ma ke kula i kēlā mahina aku nei. Kama‘āina ‘oukou i ka chijimi? He palaoa palai Kōlea, akā ‘a‘ole momona. He aha ka inoa o ka chijimi ma ka ‘ōlelo Hawai‘i? kikimi? palaoa kikimi? palaoa palai Kōlea? Makemake au i ka inoa o ka palaoa kikimi. ‘Ae! He inoa maika‘i kēia!

Ua lawe aku kekahi hoa aloha i ke kipi ‘uala kahiki Hawai‘i i ka pā‘ina, no ka mea, makemake au i nā mea Hawai‘i. Ua nani ka pū‘olo o kēia kipi ‘uala kahiki a ua ‘ono nō! Mahalo nui loa, e Atsuko! Kama‘āina maika‘i ‘oe ia‘u!

Eia ka pū‘olo.

Nani ke ki‘i!

E Atsuko, makemake au e ‘ai hou i kēia kipi ‘uala kahiki...

A hui hou.

Ke Kanauika Palani

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

Makemake au i ke kanauika, akā ‘a‘ole makemake nui i ke kanauika me ka palaoa ke‘oke‘o. ‘Ono loa ka palaoa huika piha. Eia ka makana maiā Furuta.

Ua kū‘ai mai ‘o ia i kēia kanauika Palani ia‘u. Ua ‘ono nō kēia kanauika!

He kanauika me ka hame a me ka waiūpa‘a ia. Makemake au e ‘ai hou i pēia ke kanauika! Mahalo nui loa, e Furuta!

A hui hou!

Ka Puke O Nā Moe'uhane

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

I kēia lā, ua ho‘opau au e heluhelu i kēia puke na Caren Loebel-Fried. Ua hoihoi loa nā mo‘olelo a ua nani nā ki‘i o kēia puke. Kaulana paha kēia puke. Makemake au i ka mo‘olelo "Kanaka-o-kai".

Eia ka paena pūnaewele o Caren Loebel-Fried. E kōmi ‘oukou! Nui nā ki‘i ma laila.

No ka mo‘olelo Lauka‘ie‘ie kēia ki‘i. Nani nō, ‘a‘ole anei?


Makemake au e kū‘ai mai i nā puke ‘ē a‘e a pau na Caren Loebel-Fried. ‘Ā! Ke heluhelu paha nei ‘o Kanakaloka i kēia...

A hui hou.

Ke Kamani Haole

Aloha mai nō kākou e nā makamaka heluhelu a me nā hoa aloha. Pehea mai nei ‘oukou?

Kama‘āina ‘oukou iā Edgar Cayce?

‘O Edgar Cayce kēia.

Ua ha‘i ‘o ia:

Inā ‘ai ‘oe i ‘ekolu kamani haole i nā lā a pau, ‘a‘ohe ou ma‘i ‘a‘ai.

‘O ia? ‘A‘ole au ‘ike, akā makemake au i ka ‘ono o ke kamani haole a ‘ai au i ‘ekolu kamani haole i nā lā a pau! ‘Ono loa!

A hui hou!

Ko'u Mau 'A'ahu Kōlea

Aloha mai nō kākou e nā makamaka heluhelu a me nā hoa aloha. Pehea mai nei 'oukou?

Eia ko'u mau 'a'ahu Kōlea. Ua komo au i kēia ma hope o ka papa kuke ma ka Mahina 'Ākia o Fukuoka, no ka mea, aia ka pā'ina.

He lākeke

He pihi o ka lākeke

He kāma'a

'A'ole au i pa'i ki'i o ka lole wāwae. Aloha 'ino!

Ua kū'ai mai wau i kēia mau 'a'ahu ma Kōlea i 'ekolu makahiki aku nei.

Aloha a hui hou!

Ka Mahina O 'Ākia Ma Fukuoka

Aloha mai nō kākou e nā makamaka heluhelu a me nā hoa aloha. Pehea mai nei 'oukou?

'O Kepakemapa ka Mahina o 'Ākia ma Fukuoka i nā makahiki a pau. Nui nā 'oihana e pili ana 'Ākia i Kepakemapa. Aia ka ho'olaule'a ki'i'oni'oni, nā 'aha mele, nā 'aha hula, a me nā papa kuke 'Ākia. Kōkua mau au i ko'u kula ma ka papa kuke Kōlea.

I kēia makahiki, ua kuke mākou i kēia:

Ke kuke Kōlea

He 'i'o pipi me ka leka

He lau'ai me

He mea inu ho'okomo 'ia ka hau a me ka pea

Ua 'ono nā mea a pau!

Aia ke kuke mai Kōlea, Kina, Iāpana, Nepala, 'Āina Pilipino a me Lūkia i kēia makahiki. Aia 'o Lūkia i 'Ākia? Pēlā paha... I kēia makahiki a'e, e kūlia ana wau e kuke Hawai'i! Auē!

Aloha a hui hou!

Ka Wai Meli O Kumamoto

Aloha mai nō kākou e nā makamaka heluhelu a me nā hoa aloha. Pehea mai nei 'oukou?

Eia ka makana maiā Tomoko i hele aku i Kumamoto i kēlā mahina aku nei. 'A'ole au i poina i kēia makana a i 'ole kēia ki'i, akā ua pa'ahana loa i kēlā mahina aku nei a 'a'ole i hiki ia'u ke ho'olaha i kēia.


'O sakura さくら ka inoa o ka pua keli ma ka 'ōlelo Kepanī. Ua hana paha 'ia kēia wai meli mai nā pua keli, 'a'ole 'anei?

Mahalo nui loa, e Tomoko!

Aloha a hui hou!

He Pālule A Me 'Elua Lei 'Ā'ī 'Ōma'oma'o

Aloha mai nō kākou e nā makamaka heluhelu a me nā hoa aloha. Pehea mai nei 'oukou?

Ua pa'ahana loa wau i kēia mau lā aku nei a 'a'ole i hiki ia'u ke kākau ma 'ane'i. E kala mai!

Ua hele wau e māka'ika'i hale kū'ai i kēia lā a kū'ai mai i kēia pālule a me kēia mau lei 'ā'ī. 'A'ole nui ko'u mau pālule a i 'ole lei 'ā'ī 'ōma'oma'o, no laila ua ho'oholo e kū'ai mai i kēia mau mea 'ōma'oma'o.

Ko'u pālule 'ōma'oma'o hou

Ko'u mau lei 'ā'ī hou

Ke pa'i kokoke loa o ka lei 'ā'ī o ka 'ao'ao 'ākau

Nui ko'u mau pālule polū a me ko'u mau lei 'ā'ī 'ākala. Makemake nui wau e komo i ka pa'alole.

Aloha a hui hou!

Ka'u Kā'awe Kelepona Lawelima

Aloha mai kākou e nā hoa aloha! Pehea 'oukou?


He aha kēia? 'O ka'u kā'awe kelepona lawelima. Ho'opa'a nā mea a pau i ke kā'awe ma ke kelepona lawelima ma Iāpana nei. Ua kū'ai mai au i kēia ma Kōlea i kēlā makahiki aku nei a ia makahiki aku. Makemake loa au i kēia, no ka mea, nōhie ke kaila a 'a'ole nui loa.

A hui hou.

Nā Pelena He'e Maiā Keiko

Aloha mai kākou e nā hoa aloha! Pehea 'oukou?

He mau pelena he'e maiā Keiko kēia. Ua hele aku 'o ia i Osaka a ua kū'ai mai i kēia mau pelena kaulana ma laila.

Ua 'ono kēia! E Keiko, mahalo nui loa!

Ke pa'i kokoke loa!

A hui hou!

Ka 'Aina Kakahiaka Ma'amau

Aloha mai kākou, e nā hoa aloha! Pehea 'oukou?

'O ka'u 'aina kakahiaka ma'amau kēia. 'Ai au i ka 'aina kakahiaka i ka hola 'ewalu, a laila hele au i ka hana. Ho'omaka ka'u papa mua i ka 'umi minuke i koe kani ka hola 'eiwa.

He kanauika me ka lekuke, ka pua'a hame, ka 'ōhi'a lomi a me ka waiūpa'a kēia. Ua 'ono loa!! 'A'ole au makemake i ka palaoa ke'oke'o, akā 'ono loa kēia palaoa.

He kī kēia. 'A'ole au makemake i ke kope! 'A'ole au makemake i ka honi kekahi o ke kope! Akā, aloha loa au i ke kī! Ua kū'ai mai au i kēia kī'aha kī i kēlā makahiki aku nei. Makemake au e kū'ai mai i kekahi pā o kēia pūka'ina, akā 'ano pipi'i.

A hui hou!

Hau'oli Lā Hānau, e Kuahine!

Aloha mai kākou, e nā hoa aloha! Pehea 'oukou?

'O ka lā hānau o ko'u kaikuahine kēia lā. 'O Peniko kona inoa a noho 'o ia i Nūioka me kona 'ohana. 'Ehia ona makahiki? 'Ā! He mea huna kēlā. Maka'u au i ko'u kaikuahine...

E Kuahine, Hau'oli Lā Hānau! Ke ho'ouna nei au i kēia kāleka lā hānau iā 'oe me aloha i kēia lā!

'A'ole i hiki ia'u ke kikokiko i ka 'okina a me ke kahakō ma ke kāleka.

A hui hou!

Nā Makana Ma Ka Haukapila

Aloha mai kākou e nā hoa aloha! Pehea 'oukou?



Ua loa'a ia'u kēia mau pua i ko'u manawa i noho ai ma ka haukapila. He mau 'okika kēia, 'eā?

'O 胡蝶蘭 kochōran ka inoa o kēia 'ano 'okika ma ka 'ōlelo Kepanī. 胡 ko = haole, kahiki 蝶 chō = pulelehua 蘭 ran = 'okika. No laila, 'o ka 'okika pulelehua kahiki, 'eā?

Nani kēia inoa a nani kēia pua! He makana maiā Kale a me Kimiko. Mahalo nui loa iā 'olua!

Kama'āina 'oukou iā ia? 'Ae, 'o Humu 'o ia! No ke aha ka inoa Humu? 'A'ole au 'ike! He makana nō ho'i kēia maiā Kale a me Kimiko! 'A'ole au makemake loa i nā mea pā'ani, akā he Hawai'i 'o Humu, 'eā! 'A'ole 'o Humu he Hawai'i? 'Ā! Noho 'o ia i Hawai'i, 'eā?!

A hui hou!

Ka'u Kelepona Lawelima Hou

Aloha mai kākou!

Ua kū'ai mai au i ke kelepona lawelima hou.

Wīwī a māmā ia! He 17 milimika wale nō a he 104 kalame!

Eia kēia kelepona lawelima!


'Ae, 'ele'ele ia.



Akā, polū ka papa pihi. Nui ka nani!


Eia ka papa pihi!

He aha ko'u helu kelepona? 'Ā! He mea huna ia!

A hui hou!

Nā Pōhaku Haku'ala

Aloha kākou.

Ua komo au i ka haukapila i nehinei no ka mea he pōhaku haku'ala nui ko'u. 'Eha nui ka pōhaku haku'ala! Ua noho au i ka haukapila i ho'okahi lā, a ua ha'alele au i kēia lā.

Ua hau'oli loa au, no ka mea, ua hele mai 'o Kale, 'o Kimiko a 'o Iokiko e ho'okipa ia'u ma ka haukapila. Mahalo nui loa, e 'oukou! Ua hā'awi mai 'o Kale lāua 'o Kimiko i ka 'okika ia'u! Nani loa ka 'okika a makemake au e pa'i i ke ki'i i kekahi lā.

Ua 'olu'olu loa ke kauka a ua wehewehe maika'i 'o ia, no laila, 'a'ole au i maka'u.

I kēia manawa, 'eha iki ko'u haku'ala, akā 'a'ole pilikia. E inu ana au i ka lā'au.

A hui hou!