Learning the Hawaiian Language: He 60 Moe Paipai

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Hoʻomau au e aʻo mai i ka ʻōlelo Ainu. E hoʻomaʻamaʻa hoʻokahi ana au ma mua a i ʻole ma hope o ka hana. A laila, pōmaikaʻi nō au i nā haʻawina me koʻu hoaaloha ʻĪkālia ʻo Elia. Hui māua ma Skype i hoʻokahi manawa i ka pule a hana pū māua i ke kuisa huaʻōlelo Ainu. Ma hope o ke kuisa, heluhelu māua i ka puke ʻōlelo Ainu e pili ana i ka pilinaʻōlelo a hiki iā māua ke hoʻomaʻamaʻa i nā pāpāʻōlelo Ainu i loko o ia puke. Hoihoi loa!

Makemake au e hoʻolauna i kekahi wikiō nani loa o ke mele Ainu. He wikiō kātuna kēia o kekahi mele hoʻohiamoe keiki Ainu kuʻuna. Ua haku ʻia kēia wikiō kātuna e FRPAC (The Foundation for Research and Promotion of Ainu Culture). Eia ka hōʻuluʻulu manaʻo o ia mele:

No ke aha ʻoe e uē nei?
Makemake ʻoe e lohe i ia moʻolelo?
I luna o nā ao
I luna o ka lewa
I luna iki aku hoʻi
Aia he muliwai nani
Ke piʻi aʻe i ia muliwai
I kēlā ʻaoʻao, nui nā kumulāʻau
A me nā meakanu o ka waihoʻoluʻu kālā
I kēia ʻaoʻao, nui nā kumulāʻau
A me nā meakanu o ka waihoʻoluʻu gula
Ma hope o ia muliwai
Aia he hale o ka waihoʻoluʻu gula
He hale nui
I kēlā ʻaoʻao, ua kaha kiʻi ʻia ke anilā ʻino
I kēia ʻaoʻao, ua kaha kiʻi ʻia ke anilā maikaʻi
Noho ke Akua Haku Ola i loko o ia hale
Ma ka ʻaoʻao ʻākau, aia 60 moe paipai
Ma ka ʻaoʻao hema, aia 60 moe paipai
Ma ka ʻaoʻao ʻākau, hoʻoluliluli ke Akua Haku Ola
I nā 60 moe paipai
Ma ka ʻaoʻao hema, hoʻoluliluli ke Akua Haku Ola
I nā 60 moe paipai
Hāʻule iho nā leo uē o nā pēpē
Mai ia mau moe paipai
A hiki i kēia ao
I loko o nā leo i hāʻule iho
Hānau ʻia ka mea i kapa ʻia ka hiamoe
No laila, makemake ʻoe e lohe
I ia moʻolelo
A ke uē nei ʻoe
Maikaʻi
E hīmeni aku ana au iā ʻoe
I ia moʻolelo

I koʻu manaʻo, he mele hoʻohiamoe maikaʻi loa kēia. Eia ka loulou ma YouTube. E ʻoluʻolu ʻoe e kaomi iho!