Learning the Hawaiian Language

2016-10-15

Ka lola laiki Kōlea

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ua laki nō au i ka loaʻa ʻana i ka lola laiki Kōlea mai kekahi hoaaloha oʻu i nehinei. Nui loa kaʻu hana a hele au a hauʻoli i kona loaʻa ʻana mai i ia lola laiki.

Ua lohe paha ʻoukou i ka huaʻōlelo gimbap (김밥). ʻO kekahi ʻano limu (porphyra) ka manaʻo o gim (김) a ʻo ka laiki ka manaʻo o bap (밥). ʻAno like ka lola laiki Kōlea ʻo gimbap me ka lola laiki Kepanī ʻo norimaki. Hoʻokomo ʻia ka wīneka i loko o ka laiki o ka lola laiki Kepanī, akā, hoʻokomo ʻia ka ʻaila sesamī i loko o ka laiki o ka lola laiki Kōlea, no laila ʻokoʻa loa ka ʻono. I koʻu manaʻo, ʻano momona ka lola laiki Kepanī no ka mea hoʻokomo ʻia ke kōpaʻa i loko o ka hua moa o ia lola laiki Kepanī.

Eia kekahi, ʻai pinepine ka poʻe Kōlea i ka lola laiki, no laila, hiki ke loaʻa ma nā mākeke nui, nā hale kūʻai kūpono, nā hale kūʻai meaʻai liʻiliʻi, nā hale ʻaina, nā kahua kaʻaahi a pēlā aku. ʻEkolu kaukani kālā Kōlea, ʻo ia hoʻi ma kahi o ʻekolu kālā ʻAmelika, no hoʻokahi lola laiki. ʻAno nui ka lola laiki Kōlea. Ma hope o ka ʻai ʻana iho i hoʻokahi wale nō lola laiki Kōlea, hele au a māʻona.

Ka lola laiki Kōlea

ʻOno ka lola laiki Kōlea me ka ʻiʻo pipi

Hāʻehuola.

A hui hou!

2016-10-11

Ka puke ʻōlelo Wiekanama no ka huakaʻi

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Huakaʻi au i kekahi ʻāina ʻē ma ka hopena o kēlā me kēia makahiki i ka wā hoʻomaha hoʻoilo no ka mea ʻano lōʻihi koʻu wā hoʻomaha. Ua huakaʻi au i ka mokupuni ʻo Bali ma ʻInidonesia ʻeono makahiki moekahi. Ua hoihoi a leʻaleʻa nā huakaʻi a pau i laila, akā, hele au a ʻano manakā. Makemake au e hele i kekahi ʻāina hou i kēia makahiki a laila ma hope o ka manawa nui o ka noʻonoʻo ʻana, ua hoʻoholo au e huakaʻi i Taiuana a i ʻole Wiekanama. Hoihoi au i kēia ʻelua ʻāina. Ua lolelole au i nā puke mākaʻikaʻi a kele i ka pūnaewele e pili ana iā Taiuana a me Wiekanama. I kekahi mau pule aku nei, ua kūʻai mai au i nā kikiki mokulele no Wiekanama.

I koʻu huakaʻi ʻana i Bali, ua aʻo mai au i ka ʻōlelo ʻInidonesia no ʻekolu hola i ka pule ma ka pūnaewele me kaʻu kumu ʻōlelo ʻInidonesia. Ua hoʻomau au i nā haʻawina ʻōlelo ʻInidonesia no ʻelima makahiki. Leʻaleʻa ka walaʻau ʻana ma ka ʻōlelo makuahine o kēlā me kēia ʻāina me ka poʻe ma laila, ʻaʻole anei? Ua kūʻai mai au i nā puke he nui ma Bali no nā kumuhana like ʻole a makemake au e heluhelu ma ka ʻōlelo ʻInidonesia.

E huakaʻi ana au i Wiekanama ma Kekemapa, no laila, pono au e hoʻomaka e aʻo mai i ka ʻōlelo Wiekamana. ʻAno pilikia kēia no ka mea paʻahana loa au i kēia makahiki. Eia kekahi, i koʻu manaʻo, ʻoi aku ka maʻalahi o ka ʻōlelo ʻInidonesia ma mua o ka ʻōlelo Wiekanama. Paʻakikī ka puana ʻana o ka ʻōlelo Wiekanama. He ʻōlelo nioe ka ʻōlelo Wiekanama e like me ka ʻōlelo Pākē. ʻEono nioe o ka ʻōlelo Wiekanama a ʻehā wale nō nioe o ka ʻōlelo Pākē.

Ua kūʻai mai au i kēia puke ʻōlelo Wiekanama no ka huakaʻi i kēlā hopena pule aku nei. Eia kekahi mau hopunaʻōlelo kūpono no ka huakaʻi i Wiekamana:

Aloha! - Xin chào!

ʻAe. - Vâng.

ʻAʻole. - Không.

Aia i hea ka .....? - ..... ở đâu?

Aia i hea ka lumi hoʻopau pilikia? - Nhà vệ sinh ở đâu?

Maopopo iaʻu. - Tôi hiểu.

ʻAʻole maopopo iaʻu. - Tôi không hiểu.

Mahalo. - Cám ơn.

ʻO ʻAnalū koʻu inoa. - Tên tôi là ʻAnalū.

A hui hou! - Tạm biệt!

Ka puke ʻōlelo Wiekanama no ka huakaʻi

He haumāna au. He 21 oʻu makahiki.

Ka mākaʻikaʻi ma Hanoi (Hà Nội)

Ka lumi hōkele

A hui hou!

2016-10-09

Ka hōʻikeʻike hoʻonohonoho pua o Ikenobō

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ma kahi o ʻumikūmālima makahiki aku nei, ua aʻo aku au i ka ʻōlelo Pelekānia i kekahi kumu aʻo hoʻonohonoho pua a haʻi maila ʻo ia iaʻu e hoʻomaka i nā haʻawina hoʻonohonoho pua. Ma hope o koʻu manaʻo ʻana i kekahi mau mahina, ua hoʻoholo au e aʻo mai i ka hoʻonohonoho pua. ʻO ke Kaila ʻo Sōgetsu (草月) ka inoa o kēlā ʻano hoʻonohonoho pua. Nui loa nā kaila like ʻole o ka hoʻonohonoho pua ma Iāpana e laʻa me Sōgetsu (草月), Ikenobō (池坊), Ohara (小原), Katsurako (桂古), Saga (嵯峨) a pēlā aku. Ua hoʻomau au e aʻo mai i ka hoʻonohonoho pua o Sōgetsu no ʻumi makahiki. Ma hope iho, ua hele au a paʻahana loa ma muli o ka hana a pono au e haʻalele i nā haʻawina hoʻonohonoho pua.

I kekahi mau pule aku nei, ua loaʻa iaʻu nā kikiki no ka Hōʻikeʻike Hoʻonohonoho Pua o Ikenobō (池坊) ma ke kikowaena kūʻai ʻo Iwataya (岩田屋). I koʻu hele ana i laila i nehinei, ua ʻano hoka au no ka mea liʻiliʻi wale nō nā pua i hoʻonohonoho ʻia i ke kaila kuʻuna. Ua ʻike au i nā hoʻonohonoho pua me ka pepa kala i hoʻokomo ʻia i loko. I koʻu manaʻo, ʻano ʻē kēlā. ʻOi aku koʻu makemake i nā mea kuʻuna ma mua o nā mea hou loa. E hoʻouka ana au i kekahi mau kiʻi o nā hoʻonohonoho pua kuʻuna o ka hōʻikeʻike ma lalo.