Nā kamakūaka

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā?

I koʻu wā kamaliʻi, ua lohe au i ka huaʻōlelo ʻo kamakūaka, akā, ʻaʻole au i ʻai i ia huaʻai.  No ke aha lā?  Ua kākaʻikahi paha nā kamakūaka ma Nūioka i kēlā wā, a i ʻole ʻaʻole makemake paha nā keiki i kēlā ʻono kūikawā o nā kamakūaka.  ʻAʻole au ʻike pono i ke kumu o koʻu ʻai ʻole ʻana.  Ma Iāpana nei, loaʻa nā kamakūaka ma nā hale kūʻai ma waena o nā mahina o Ianuali a me Malaki.  Nani ka waihoʻoluʻu a ʻano kiuke nā kamakūaka ma muli o ka liʻiliʻi o ia huaʻai.  He ʻekolu wale nō kenimika ke anawaena.  Liʻiliʻi nō!

I kēlā pule aku nei, ua hele kekahi haumāna au i ka mokuʻāina ʻo Miyazaki (宮崎) a ua kūʻai mai ʻo ia i nā kamakūaka ma laila.  Ua heluhelu au ma ka pūnaewele puka 70 pākēneka o nā kamakūaka Kepanī mai Miyazaki.  Kaulana nō ʻo Miyazaki i nā manakā pipiʻi loa.  Ua lohe au hoʻokahi haneli kālā ʻAmelika no hoʻokahi manakā Miyazaki.  Auē nō hoʻi ē!

Nā pua kamakūaka

He kiʻi o nā kamakūaka

Nā kamakūaka

Nani ka waihoʻoluʻu

Nā kamakūaka ma koʻu hale

Ua huli au i ka huaʻōlelo ʻo kamakūaka i kekahi mau ʻōlelo like ʻole:

ka ʻōlelo Hawaiʻi - kamakūaka
ka ʻōlelo Tonga - kamikuati
ka ʻōlelo Kōlea - 금귤 (金橘  geumgyul)
ka ʻōlelo Pākē - 金橘 (jīnjú) 
ka ʻōlelo Kepanī - 金柑 (きんかん kinkan)
ka ʻōlelo Wiekanama - kim quất
ka ʻōlelo ʻInidonesia - buah kumkuat
ka ʻōlelo Pōlani - kumkwat
ka ʻōlelo ʻUkelena - кумкват (kumkvat)
ka ʻōlelo Nepala -  मुन्तला (muntala)
ka ʻōlelo Tailani -   ส้มจี๊ด (somchíd)
ka ʻōlelo Malaiālama - കുംകാറ്റ് ഓറഞ്ച് (kuṅkāṟṟ ōṟañc)
ka ʻōlelo ʻAlapia -   کام‌کوات (kam‌kwat)

 

A hui hou!