Ke Ao Nani

Aloha mai nō kākou e nā makamaka heluhelu a me koʻu mau hoaaloha!  Pehea mai nei ʻoukou i kēia lā? 

ʻAʻole au i kākau i nā ʻatikala ma ʻaneʻi no ka manawa lōʻihi.  E kala mai ʻoukou iaʻu, akā naʻe, e hoʻāʻo ana au e ʻōʻioʻio i kēlā me kēia lā!  Hiki ke heluhelu ma ʻaneʻi.  E hahai mai ʻoukou iaʻu a e ʻōʻioʻio kākou a pau ma ka ʻōlelo Hawaiʻi!  He leʻaleʻa nō.

Ua hāʻawi mai kekahi hoaaloha oʻu i kēia puke ʻo Ke Ao Nani.  He puke huaʻōlelo 1000 i kākau ʻia na Alohalani Housman.  Ua ʻike au i ia puke ma Amazon no kanakolukūmāono kālā.  ʻAno pipiʻi paha no ka mea he ʻili puke paʻa ko kēia puke.

Eia ka papa kuhikuhi o ka puke:  Ke Kino, Nā Hānaiahulu, Nā Manu, Nā Pono Kula, Nā Mea Pāʻani, Ke Kahua Pāʻani, Nā Waihoʻoluʻu, Nā Kinona, Nā Helu, Nā Hana, Nā Hoa ʻĒkoʻa, Nā Pono Hale, Ka Lumi Kuke, Ka Hale Hana, Ka Māla, Nā ʻElala, Ke Anilā, Ka Pāumu, Nā Alakau, Kahakai, Ka Mākeke Mahiʻai, Ka Hale Kūʻai Meaʻai, Nā Pono Hula, Ke Keʻena Kauka, Nā Haʻuki, Nā ʻOihana, Ka Pāʻina Lā Hānau, Ka Meaʻai, Nā Meaola Kai, Nā Holoholona, Nā Kumulāʻau a me nā Meakanu, Nā Meakanu, Nā Pua, Papa Wehewehe Huaʻōlelo.  Hiki ke heluhelu i nā huaʻōlelo e laʻa me ke kāʻei ʻāʻī, ka meaʻai ʻīlio, ka hale ʻīlio, ka peni kuni, ka pepaānue, ka pāpeta, nā maka kiʻi, ka ʻuʻupekupeku lio, nā pelaha, ka hainakā pepa, ka pahu paʻahau, ka ʻūhili nalo, ka pae palaka uila, ka ponumomi, ke kaʻa hai, ke kaʻa wane, ka mīkini ʻohi kālā, ke koʻokoʻo kālele, ka pana pua, ka mea ʻako lauoho, ke kimchī, ka sūshī, ka lokomoko, ka chāsiu, ka haukōhi a pēlā aku.  I koʻu manaʻo, hiki iā ʻoukou ke aʻo mai i kekahi mau huaʻōlelo hou me ka heluhelu ʻana i ia puke.

Ka leka mai koʻu hoaaloha

Ka ʻili puke

Ka meaʻai

Nā pua

He makana maikaʻi loa kēia puke.  Hiki iā ʻoukou ke kūʻai mai no ka makana Kalikimaka, ʻeā?

A hui hou!