Learning the Hawaiian Language: 2014-05

2014-05-29

Ke kī ʻōmaʻomaʻo ʻo Hatsukoi

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

I kēia pō, ua loaʻa iaʻu he kī hou. He kī ʻōmaʻomaʻo kēia, akā, ʻano ʻokoʻa, no ka mea ua kāwili ʻia kēia kī ʻōmaʻomaʻo me nā lauʻala. Ua hoʻokomo ʻia ka pili lemi a me nā lemi ʻōmaʻomaʻo. Ua like ke ʻala o kēia kī me ke ʻala o ka lemi a ʻano like ka ʻono o kēia kī me ke kī ʻōmaʻomaʻo.

Hoihoi ka inoa o ua kī nei. ʻO Hatsukoi 初恋 ka inoa. ʻO mua loa ka manaʻo o hatsu 初 a aloha ka manaʻo o koi 恋, no laila o ke aloha mua loa a i ʻole ke aloha maka mua ka manaʻo o kēia inoa. No laila, i loko o ke kiʻi o ka pahu kī, hiki ke ʻike ʻia ke kiʻi o ʻelua keiki.

He kī mai ka hale kūʻai kī ʻo Lupicia kēia. Nui loa koʻu makemake iā Lupicia no ka mea nui nā ʻano kī ma laila. Eia kekahi, nani ka hakulau o nā huamana o Lupicia.

Ke alo o ka pahu kī

Ke kua o ka pahu kī

Nā ʻeke kī

Ua mākaukau au!

He kī ʻōmaʻomaʻo ʻo Hatsukoi

ʻOno loa!

A hui hou!

Ka ʻālani ʻIseraʻela

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ua kūʻai mai au i nā ʻālani ʻIseraʻela ma ka hale kūʻai ʻAmelika ʻo Costco ma Fukuoka nei. ʻAʻole au i kamaʻāina i kēia ʻano ʻālani ma mua. ʻO Jaffa ka inoa o kēia ʻano ʻālani a hoʻoulu ʻia ma ʻIseraʻela, Kupero, ʻIraka, Lebanona, Suria, Ioredāne, a me Tureke. ʻO תפוזי ג'אפה (tepvezy g'aph) ka inoa o ia ʻālani Jaffa ma ka ʻōlelo Hepela. He mānoanoa ka ʻili o ia ʻālani. Momona ka ʻālani Jaffa a nani loa ka waihoʻoluʻu ʻālani o kēia huaʻai.

Nā ʻālani Jaffa mai ʻIseraʻela

Ka pepili Jaffa

Ka ʻālani i ihi ʻia

He kiʻi o ka wā kahiko

He poʻoleka ʻIseraʻela me nā ʻālani Jaffa

He pelaha o ka wā kahiko

He pelaha me ka wahine Palesetine

A hui hou!

2014-05-27

Kamaʻāina anei ʻoe iā Spark People?

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

I kekahi lā o ka makahiki 2011, ua kele au i ka pūnaewele i ke kahua paʻa e pili ana i ka hoʻēmi kino ʻana. Nui loa nā kahua paʻa no ka hoʻēmi kino ʻana, ʻaʻole anei? I koʻu heluhelu ʻana e pili ana i ke kahua paʻa o Spark People, ua hoihoi au i ke kaiaulu ma laila. ʻAno ʻokoʻa ua kahua paʻa nei a ua manaʻo au inā kāinoa au ma laila, hiki paha iaʻu ke hoʻēmi kino me ka leʻaleʻa. ʻĀ! He manuahi ʻo Spark People! Eia ka loulou ma ʻaneʻi. Ua ʻeʻe au ma Spark People i kekahi mau mahina a ma hope ua moloā au. Auē! Akā naʻe, ua hoʻāʻo au e kākau i nā mea a pau ma ka ʻōlelo Hawaiʻi ma Spark People. I nehinei, ua hoʻomaka hou au ma laila. ʻAʻole momona loa au. Ua kāinoa au no ka mea makemake au e hoʻēmi iki i ka momona o koʻu kino. A laila, hoihoi nō hoʻi au i ka hoʻoikaika kino ʻana.

ʻAno hilahila au e kākau iho ma kaʻu puke moʻomanaʻo pūnaewele nei i koʻu inoa mea hoʻohana, akā, e kākau iho ana. ʻO Kalanakila. Auē! He inoa ʻano hilahila.

I koʻu ʻōlelo Hawaiʻi ʻana iaʻu iho, hoʻohana au i ka huaʻōlelo Hunaahi no ke kahua paʻa ʻo Spark People. He inoa pōkole a he inoa ma ka ʻōlelo Hawaiʻi. He lālā o Hunaahi kekahi makamaka heluhelu ma ʻaneʻi? Inā pēlā, hauʻoli nō au!

Ka hakulau lōkō

Kaʻu ʻaoʻao ma Hunaahi

A hui hou!

2014-05-25

Ka hale ʻauʻau pūnāwai ʻo Oncri

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ma hope o koʻu ʻai ʻana i ka ʻaina awakea ma ka hale ʻaina ʻo Shōbu Gozen i nehinei, ua hele au i ka hale ʻauʻau pūnāwai ʻo Oncri. Kokoke ʻo Shōbu Gozen i Oncri, ʻo ia hoʻi, ma kahi o ʻelima minuke ka lōʻihi ma ke kaʻa.

He hale ʻauʻau pūnāwai ʻo Oncri. Aia ma ke kaona liʻiliʻi ʻo Furuyu (古湯)ʻo Oncri. ʻAno ʻokoʻa ka pūnāwai ma kēia kaona pūnāwai no ka mea ʻaʻole wela loa. He 38 kēkelē Kelekia (100.4 kēkelē Palanaheika) wale nō nā ʻauʻau pūnāwai ma Oncri. ʻAʻole wela, no laila, hiki ke ʻauʻau i loko no ka manawa lōʻihi loa.

Ka hōʻailona o Oncri

Ke alo o ka hale

Ka ʻīpuka

Ka lumi o nā pahu laka kāmaʻa

Ka ʻauʻau wāwae

Ka ʻauʻau pūnāwai

Ka ʻīpuka no nā kāne

Ka ʻauʻau pūnāwai

Ka ʻauʻau kaupokulani

A hui hou!

2014-05-24

Ka hale ʻaina Kepanī ʻo Shobu Gozen

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

ʻO Saga kekahi mokuʻāina aʻe pono i ka mokuʻāina ʻo Fukuoka, a ʻaʻole mamao loa mai ke kaona ʻo Fukuoka. Nui ka poʻe o nā kūlanakauhale e haʻi he kuaʻāina ʻo Saga. Pololei nō! No laila, nui koʻu makemake i ka mokuʻāina ʻo Saga. Noho au i ke kaona ʻo Fukuoka a ma ʻō aku o ka 1.5 miliona poʻe e noho ma ʻaneʻi. Ke hoʻohālikelike ʻia, ʻoi loa aku ka mālie o Saga ma mua o Fukuoka.

I kēia lā, ua hele au i Saga e ʻai i ka ʻaina awakea ma ka hale ʻaina ʻo Shōbu Gozen (菖蒲ご膳). ʻO ka puapalani ka manaʻo o shōbu 菖蒲 a ʻo ka ʻaina ka manaʻo o gozen ご膳. No laila, ʻo ka ʻaina o nā puapalani ka manaʻo o kēia inoa, akā, ʻaʻole ʻai i nā puapalani! He hale ʻaina o ka meaʻai hāʻehuola Kepanī a nui nā lauʻai no ka ʻaina a pau. Loaʻa ka hale ʻaina i luna o ka puʻu a hiki ke ʻike ʻia ka loko o ka pani wai ʻo Kasegawa (嘉瀬川) ma lalo. Nani loa ka nānaina! Inā hoihoi ʻoe i kēia hale ʻaina, e kaomi ma ʻaneʻi a nānā i ke kahua paʻa.

Ka hōʻailona o ka hale ʻaina ʻo Shōbu Gozen

Ka nānaina o ka loko o ka pani wai

Ka pua i loko o koʻu lumi ʻaina pilikino

Ua kākau ʻia 薫風 i ke kiuna i loko o koʻu lumi ʻaina

Ka wai palama

Ka iʻa maka

Nā meaʻai like ʻole

Nā lauʻai mauna ʻōiwi ma Saga i palai hoʻoluʻu ʻia

Ka laiki keʻokeʻo

He kele kī me nā pāpapa momona na ka monamona

Nā lāpaki kiʻi i loko o ka hale ʻaina

Ka pueo i loko o ka hale ʻaina

A hui hou!

2014-05-23

Ka manakō maka o Taiuana

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Eia ka manakō maka o Taiuana. Ua ʻono ka manakō maloʻo o ka ʻĀina Pilipino, akā, ʻoi aku ka ʻono o ka huaʻai maka ma mua o ka huaʻai maloʻo, ʻeā? Ua pono au e paʻi i ke kiʻi o kēia manakō ma mua o ke ʻoki ʻana, akā, ua hoʻomākaukau ʻāwīwī a laila ua poina i kēia puke moʻomanaʻo pūnaewele aʻu. No laila, hoʻokahi wale nō aʻu kiʻi! E like ke kinona o ka manakō Taiuana me ke kinona o ka manakō maʻamau. ʻOi aku ka nui o ka manakō Tailani ma mua o ka manakō Taiuana, akā naʻe, aia paha nō i ke ʻano manakō, ʻaʻole anei?

Hū ka ʻono!

A hui hou!

2014-05-22

Ka manakō maloʻo o ka ʻĀina Pilipino

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

I ka Poʻalua o kēia pule, ua loaʻa iaʻu he ʻeke manakō maloʻo mai ka ʻĀina Pilipino. Nui koʻu makemake i ka manakō, a inā hiki, makemake au e ʻai i ka manakō i kēlā me kēia lā. Akā naʻe, pipiʻi loa ka manakō, e like me ka huaʻai a pau, ma Iāpana nei. I koʻu huakaʻi ʻana i ka ʻāina ʻē, hoʻāʻo au e ʻai i nā huaʻai maka like ʻole. Nui nā ʻano manakō ma Bali i ʻInidonesia. Eia kekahi, ʻono a emi ka manakō ma Bali. Ua hauʻoli loa au e loaʻa i ka manakō maloʻo Pilipino. Ke ʻai nei au i ka manakō a ke inu nei au i ke kī ʻōmaʻomaʻo i kēia manawa. Aia he kahua paʻa o kēia hui manakō i kapa ʻia ʻo 7D ma ka ʻōlelo Kepanī.

ke ʻeke manakō maloʻo

nā manakō

ke kiʻi mai ke kahua paʻa o 7D

A hui hou.

2014-05-21

ʻOno ʻo Ono

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

I ka pō nei ma hope o ka hana, ua hele au me kekahi mau hoaaloha i ka hale ʻaina Kepanī i kapa ʻia ʻo Ono ma Sakurazaka ma Fukuoka nei. ʻEono paha ʻehiku paha aʻu hele ʻana i laila, a i koʻu manaʻo ʻono ia hale ʻaina. Kohu mea lā, ʻaʻole nui ka poʻe e kamaʻāina i ka hale ʻaina ʻo Ono no ka mea ʻano mamao mai ka ʻāpana pāʻoihana kauwaena ʻo Tenjin ma Fukuoka. Hauʻoli nō au i ka mālie o ua hale ʻaina nei. Eia kekahi, loaʻa ʻo Ono i luna pono o kekahi puʻu ʻano kiʻekiʻe. Ma muli o kēia waihona ʻāina nani loa ka nānaina o ke kaona ma lalo me nā nuʻuoʻa he nui i hoʻomālamalama ʻia e nā kukui hulili.

ʻAʻole kēia hale ʻaina ʻo Ono he inoa Hawaiʻi. ʻAʻohe ʻokina ma mua o ka pela ʻana o Ono, ʻeā? Kākau ʻia ka inoa ʻo Ono me nā huapalapala kiʻi Kepanī 小野. ʻO liʻiliʻi ka manaʻo o 小 o a laila ʻo māla ka manaʻo o 野 no. No laila, ʻo ka māla liʻiliʻi ka manaʻo piha o 小野 ono.