Ke koala o Paco Life

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

I koʻu hele ʻana i ka hale hoʻolimalima DVD ʻo Geo i kēlā hopenapule aku nei, ua ʻike au i ka makasina ʻo Paco Life a i ʻole Pako Raifu パコライフ ma ka ʻōlelo Kepanī.  He makasina manuahi no ka ʻimi hana ʻana ʻo Paco Life.  Loaʻa he koala i nā makasina a pau o Paco Life.

Mālama ʻia ka Hoʻokūkū Pōwāwae Kauʻāina i kēia manawa, no laila, ua like ke koala o ka pukana hope loa me ka mea hulahula o ke kāniwala Palakila.  Hiki nō hoʻi ke ʻike ʻia ke kinipōpō pōwāwae.

ʻO Pokoran ポコラン ka inoa o kēia koala.  ʻAno kiuke, ʻaʻole anei?

ʻO Pokoran kēia.

A hui hou!

Ka pāheona o ka lāhui Huichol

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Hoihoi ka pāheona o ka honua a puni, ʻeā?  I koʻu kele ʻana i ka pūnaewele i kēia lā, ua heluhelu au i kekahi ʻatikala ma ke kahuapaʻa ʻo Magic Tranistor e pili ana i ka pāheono o ka lāhui Huichol.  Ua pūʻiwa au i ka nani o nā waihoʻoluʻu o nā kiʻi.  Liʻiliʻi koʻu ʻike o ka moʻomeheu o ʻAmelika Waena a me ʻAmelika Hema a ua hoʻoholo au e kākau i kēia ʻatikala no ka mea noho ka lāhui Huichol i nā mokuʻāina o Jalisco a me Nayarit ma Mekiko.  Ma hope o ka hōʻea ʻana o ka poʻe Sepania i Mekiko ma ke kenekulia ʻumikūmāono, ua pūheʻe ka lāhui ʻōiwi ʻo Huichol no ka noho ʻana i nā mauna.  Ma o kēia nohona i nā mauna mamao i ka poʻe Sepania i ka wā kahiko, ua mālama ʻia ka moʻomeheu o ka lāhui Huichol.

Ua hoʻokumu ʻia ka hoʻomana o ia poʻe i ke kahikolu, ʻo ia hoʻi, ke kia, ke kūlina, a me ka peyote (he ʻano pānini).  I ka wā kahiko, ʻaʻole ka ʻōlelo Huichol he ʻōlelo kākau ʻia, akā naʻe, ua hoʻohana ʻia kēia ʻano kiʻi no ka mālama ʻana i nā moʻolelo o ka wā kahiko a me ka manaʻo o ko lākou hoʻomana.

I kēia manawa, kaulana loa ka pāheona Huichol i ka hoʻohana ʻana i ka pāaniani a me nā olopī.

 

A hui hou!




Nā huaʻōlelo:

Ka 'Aha'aina o nā Akua

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ua nānā paha ʻoukou i kekahi pūkaʻina polokalamu kīwī Kōlea a i ʻole kekahi kiʻiʻoniʻoni Kōlea?  Kaulana loa nā pūkaʻina polokalamu kīwī Kōlea ma ʻĀsia nei.

I kēlā hopenapule aku nei i koʻu hele ʻana i ka hale hoʻolimalima DVD ʻo Geo, ua koho au i kekahi pūkaʻina polokalamu kīwī Kōlea.  ʻO Ka ʻAhaʻaina o nā Akua  Sindeului Manchan 신들의 만찬 ka inoa o ia pūkaʻina.  ʻO Akua ka manaʻo o sin 신, he huaʻōlelo no ka helunui ka manaʻo o deul 들, ʻo no ka manaʻo o i 의, a ʻo ʻahaʻaina ka manaʻo o manchan 만찬.  Ua puka ʻo Ka ʻAhaʻaina o nā Akua ma ke kānela Kōlea ʻo MBC ma ka lā 4 o Pepeluali 2012 a hiki i ka lā 20 o Mei 2012 a loaʻa 32 pukana o kēia pūkaʻina.  Nani ke kahuapaʻa ʻo Ka ʻAhaʻaina o nā Akua ma MBC.  Loaʻa 2 pukana i hoʻokahi DVD, no laila, pono au e hoʻolimalima i 16 DVD.

ʻO ka moʻolelo o Ka ʻAhaʻaina o nā Akua, loaʻa he hale ʻaina kuʻuna Kōlea ʻo Arirang 아리랑 me ka meaʻai o ka ʻohana mōʻī.  Huli ʻo Arirang i ka hoʻoilina o ka hale ʻaina me ka heihei kuke o ʻelua wahine, ʻo ia hoʻi, ʻo Ha In-joo 하인주 lāua ʻo Go Joon-young 고준영.  ʻO Seo Hyun-jin 서현진 ka mea hana keaka o ka hāmeʻe o Ha In-joo a ʻo Sung Yu-ri 성유리 ka mea hana keaka o ka hāmeʻe o Go Joon-young.

E hoʻomaka ka heihei kuke!  ʻO wai ka mea lanakila o ia heihei kuke?  ʻO wai lā?

ʻO Ka pūkaʻina ʻo Ka ʻAhaʻaina o nā Akua   신들의 만찬

Ka meaʻai aloaliʻi Kōlea

ʻO Sung Yu-ri 성유리

ʻO Seo Hyun-jin 서현진

A hui hou!




Nā huaʻōlelo:

Ka hale hoʻolimalima DVD ʻo Geo

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

 

Hele paha ʻoukou i ka hale kiʻiʻoniʻoni i kēlā me kēia manawa?  Pipiʻi loa ke kiʻiʻoniʻoni ma Iāpana nei.  He 18 kālā ʻAmelika ke kiʻiʻoniʻoni ma ʻaneʻi.  Pipiʻi, ʻeā?  ʻO ka mea maikaʻi i loko o ka hale kiʻiʻoniʻoni, ʻo ia ka papakaumaka nunui me nā pahu leo nui.  Pipiʻi ke kiʻiʻoniʻoni a paʻahana nō hoʻi au, no laila, makemake au e nānā i nā wikiō ma YouTube a i ʻole i ka hale hoʻolimalima DVD e hoʻolimalima i nā DVD.  Ua loaʻa nā hale hoʻolimalima wikiō nui a me nā hale hoʻolimalima liʻiliʻi ma Iāpana, akā, hiki ke nānā me ka maʻalahi i nā wikiō ma ka pūnaewele i kēia mau makahiki a liʻiliʻi nā hale hoʻolimalima wikiō.  Ua pani kēlā me kēia hale hoʻolimalima wikiō liʻiliʻi a i kēia manawa, koe nā hale hoʻolimalima DVD nui wale nō.  Ua loli ke au o ka manawa o kēia lā.  Ua kapa ʻia kēia ʻano wahi i ka hale hoʻolimalima wikiō ma mua, akā, ʻaʻohe wikiō i loko, a loli ka inoa.  He hale hoʻolimalima DVD (dēwīdē) i kēia manawa.

I nehinei a ia lā aku, ua hele au i ka hale hoʻolimalima DVD ʻo Geo.  He hui hoʻolimalima DVD nui kēia a puni Iāpana nei.  Hiki ke hoʻolimalima i nā DVD, nā sēdē, nā puke kātuna, a me nā pāʻani kamepiula ma Geo.  He 96 kālā Kepanī (e like me hoʻokahi kālā ʻAmelika) i ka DVD kahiko no hoʻokahi pule.  Emi, ʻaʻole anei?

ʻO ka hale hoʻolimalima DVD ʻo Geo

Nā pāʻani kamepiula, nā DVD, nā sēdē, nā puke kātuna

He 96 kālā Kepanī i ka DVD kahiko

Kaupalena ʻia a hiki i 20 DVD

Ka pahu hoʻihoʻi a me ka mīkini kūʻai ma waho

Nui nā DVD

ʻO Haeshin kekahi kiʻiʻoniʻoni punahele oʻu

Nā puke kātuna

Nā puke kātuna ʻo Fairy Tail

A hui hou!





Nā huaʻōlelo:
hale kiʻiʻoniʻoni - movie theater,  영화관,　映画館
papakaumaka - screen,  화면,　画面
nunui - huge,  크다,　でかい
pahu leo - speaker,  스피커,　スピーカー
paʻahana - busy,  바쁘다,　忙しい
hoʻolimalima - to rent,　レンタルする
hale hoʻolimalima wikiō - video rental shop,　レンタルビデオ店
hale hoʻolimalima DVD (dēwīdē) - DVD rental shop,　レンタルDVD店
i nehinei a ia lā aku - the day before yesterday,  그저께,　一昨日
puke kātuna - comic book, 만화,　漫画
pāʻani kamepiula - computer game,　PC 게임,  パソコンゲーム
mīkini kūʻai - vending machine,  자동판매기,　自動販売機

Ka ʻaina awakea ma Goyang

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Ua pakiʻi ke kaea hope o koʻu paikikala i ke kū ʻana paha i ke kui, no laila, ua hele au i ka hale kūʻai paikikala no ke kāpili ʻana.  I koʻu kali ʻana, ua hele e ʻai i ka ʻaina awakea ma kekahi hale ʻaina Kōlea ʻano kokoke i ia hale kūʻai paikikala.
 

ʻO Goyang 고양 ka inoa o ka hale ʻaina Kōlea a loaʻa i loko o ke kikowaena kūʻai liʻiliʻi ma Sasaoka 笹岡.  ʻAno emi ʻo Goyang no laila ʻaʻole hiki ke namunamu e pili ana i ka ʻono.  I kēia awakea, ua ʻai au i ka seolleongtang 설렁탕.  He kupa nōhie ia i hana ʻia me ka ʻiʻo pipi, nā nulu a me nā ʻakaʻakai lau.  Ua ʻai au i ia kupa me ka laiki, ka gim 김 (kekahi ʻano limu maloʻo) a me ke kimchi 김치.

Ma ka ʻaoʻao o ka hale ʻaina Kōlea ʻo Goyang, e kūʻai aku ana nā meaʻai Kōlea.  No laila, ʻano like me kekahi mākeke liʻiliʻi no nā meaʻai like ʻole o Kōlea.  Hiki ke kūʻai mai i ke kimchi, ke kope, ka wīneka, ke kupa, ka limu, ka ʻaila sesame, ke kai iʻa, nā nulu hikiwawe, a pēlā aku.

Ka hale ʻaina Kōlea ʻo Goyang

ʻO ke kupa ʻo seolleongtang

Ka mākeke liʻiliʻi

Nā meainu Kōlea

He kimchi

A hui hou!

Nā huaʻōlelo:

pakiʻi - flat,  펑크,  パンク

kaea - tire,  타이어,  タイヤ

paikikala - bicycle,  자전거,  自転車　

namunamu - to complain,  불평하다,  文句を言う

nulu - noodles,  면류,  麺類

ʻakaʻakai lau - green onion,  파,  小ねぎ

wīneka - vinegar,  식초,  酢

nulu hikiwawe - instant noodles,  라면,  インスタントラーメン

Ka pāheona hoʻomana Hinekū

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

He nui koʻu hoihoi i ka pāheona hoʻomana.  He pāheona i piha i ke aloha ka pāheona hoʻomana, ʻo ia hoʻi, ke aloha no ke Akua, ke aloha no ka poʻe kekahi i kekahi, ke aloha no nā mea a pau.  Eia kekahi, hoʻohana ʻia ke kālā nui no ka pāheona hoʻomana mai ka wā kahiko loa, no laila, i koʻu manaʻo, nani nō nā kiʻi hoʻomana.

Hoihoi au iā ʻĪnia a leʻaleʻa ke kele ʻana i nā kiʻi hoʻomana Hinekū ma ka pūnaewele.  I kēia lā, e hoʻouka ana au i kekahi kiʻi hoʻomana Hinekū.  ʻO Krishna a i ʻole Kṛṣṇa कृष्ण ma ka ʻōlelo Hinekū kēia kāne me Radha (Rādhā राधा).  ʻO Radha kēia wahine e hoʻolohe ana i ka hoʻokani puluka ʻana o Krishna.  I ka hapanui o ka manawa, hoʻokani ʻo Krishna i ka puluka.  Nani kēia kiʻi.

ʻO Krishna me Radha

A hui hou!





Nā huaʻōlelo:
pāheona - art,  미술,　美術
hoʻomana - religion,  종교,　宗教
pāheona hoʻomana - religious art, 종교 미술,　宗教美術
ʻĪnia - India, 인도,　インド
hoʻomana Hinekū - Hinduism,  힌두교,　ヒンズー教
hoʻouka - to upload,  업로드하다,　アップロードする
ʻōlelo Hinekū - Hindi,  힌디어,　ヒンディー語
puluka - flute,  피리,　笛

Aynu Itak - Ka ʻōlelo Ainu

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

ʻAʻole i hiki iaʻu ke kākau ma ʻaneʻi i nehinei ma muli o ka hana nui.  Paʻahana au i kēia lā kekahi, akā, e hoʻāʻo au e kākau i kēia ʻatikala pōkole e pili ana i ka ʻōlelo Ainu.

I nehinei, ua hoʻomaka au i nā haʻawina ʻōlelo Ainu me koʻu hoaaloha ʻĪkālia hou ʻo Elia.  Ua aʻo ʻē mai ʻo ia i ka ʻōlelo Ainu no ʻelua makahiki paha ʻekolu makahiki paha.  He haumāna muli puka ʻo ia a ʻo ka ʻōlelo Ainu ke kumuhana no kāna palapala laeoʻo.

ʻAʻole nui nā puke ʻōlelo Ainu ma ka hale kūʻai puke, akā, ua i hiki iaʻu ke kūʻai mai i kekahi mau puke a me ka puke wehewehe ʻōlelo kekahi.

ʻŌlelo kekahi mau kānaka ma Iāpana he ʻano ʻōlelo Iāpana ka ʻōlelo Ainu.  ʻAʻole pololei kēlā.  ʻOkoʻa loa!  He ʻōlelo ʻōiwi Kepanī ka ʻōlelo Ainu.  ʻO Aynu Itak ka inoa ʻōiwi o ka ʻōlelo Ainu.  Eia kekahi, ʻo ka poʻe ka manaʻo o Aynu a ʻo ka ʻōlelo ka manaʻo o Itak, no laila, ʻo ka ʻōlelo o ka poʻe wale nō ka manaʻo o Aynu Itak.

ʻAno like ka pilinaʻōlelo Ainu me ka pilinaʻōlelo Kepanī, akā, nui nā mea ʻokoʻa o ka pilinaʻōlelo.  Ua like ka puana o nā woela ʻōlelo Ainu me nā woela ʻōlelo Kepanī a i ʻole nā woela Sepania, a laila, ua like ka puana o nā koneka ʻōlelo Ainu me nā koneka ʻōlelo Kōlea.  No laila, nāwaliwali loa ke kani K ma ka hopena o ka huaʻōlelo Ainu ʻo sak.  ʻO ke kauwela ka manaʻo o sak.

Pau kēia ʻatikala me ka huaʻōlelo Ainu no mahalo.  Iyairaykere.  Hiki ke puana ʻia e like me i-yai-ray-kere.  

Auē!  ʻAʻole maikaʻi loa nā kiʻi i kēia lā!  E kala mai.
 

Kaʻu puke aʻo me Elia

Ka puana o ka ʻōlelo Ainu

Ka pāpāʻōlelo o ka mokuna 1

A hui hou!





Nā huaʻōlelo:
ʻĪkālia - Italy, 이탈리아,　イタリア
haumāna muli puka - graduate student,  대학원생,　大学院生
palapala laeoʻo - thesis,  졸업 논문,　卒業論文
hale kūʻai puke - bookstore,  서점,　書店
pilinaʻōlelo - grammar,  문법,　文法
puana - pronunciation,  발음,　発音
woela - vowel,  모음,　母音
koneka - consonant,  자음,　子音

Ke kalekona o Yasuna

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Nui kaʻu hana ma ke kula i kēia pule a me kēia pule aʻe.  Inā hiki, e hoʻāʻo ana au e kākau i kekahi ʻatikala ma ʻaneʻi i nā lā a pau, akā, he ʻatikala pōkole paha.

I ka lolelole ʻana i nā kiʻi aʻu i paʻi ai ma mua, ua loaʻa kēia kiʻi i kēia kakahiaka.  I kekahi mau pule aku nei, ua hele au i ke kaona ʻo Arita 有田 ma ka mokuʻāina o Saga 佐賀 ma Iāpana.  Ke hele au ma laila, ʻai au ma ka hale ʻaina ʻo Yasuna 保名.  He hale ʻaina kuʻuna Kepanī.  Nani ka hale, nani nā lumi, nani nā pā, nani nā mea a pau!  A laila, ʻono ka meaʻai!  I loko o ka lumi pilikino ma laila, ua ʻike au i kēia kiʻi ma ka paia.  Ua pena kiʻi ʻia kēia ma ke kile lāmeka.

Makemake au e hele i Yasuna i kēia hopenapule!

Ke kalekona o Yasuna

A hui hou!

Nā huaʻōlelo:
kalekona - dragon, 용,  龍
ʻatikala - article,  기사,　記事
lolelole - to browse,　見て回る
mokuʻāina - state,  주,　県
kuʻuna - traditional,  전통,　伝統的な
lumi pilikino - private room,  독방,　個室
paia - wall,  벽,　壁
pena kiʻi - to paint,　描く
kile lāmeka - ceramic tile,　セラミックタイル
hopenapule - weekend,  주말,　週末

 

Ka hoʻēmi kino

Aloha mai nō kākou e nā makamaka heluhelu a me koʻu mau hoaaloha! Pehea mai nei ʻoukou i kēia lā?

Na koʻu kaikuahine ma ʻAmelika i haʻi mai iaʻu i ʻelua makahiki aku nei kaulana ʻO Bob Greene ka mea kākau e pili ana i ka hoʻoikaika kino a ua hāʻawi mai ʻia au i kāna puke ʻo The Best Life Diet e koʻu kaikuahine no ke Kalikimaka.

I kēia mau pule, ʻaʻole loa, i kēia mau mahina, ua hele au a momona!  Auē nō hoʻi ē!  ʻAʻole au momona loa, akā, he mea huna kēia, ʻaʻole hiki iaʻu ke komo i kekahi mau lole wāwae oʻu no ka mea likiliki loa.

He aha ka pilikia?  He aha ke kumu o koʻu momona?  Makemake au e ʻai i nā mea a pau a me nā mea momona.  Inu au i ka pia i koʻu hele ʻana i ka hale ʻaina me nā hoaaloha.  Paʻahana au i ka lā holoʻokoʻa a ʻai au i ka ʻaina ahiahi ma hope o ka hola ʻumi o ka pō a ma hope hoʻi koke au i ka hiamoe.  Ua haʻalele au i ka hele ʻana i ka hale hoʻoikaika kino no ka mea ua neʻe au a mamao ka hale hoʻoikaika kino mai koʻu keʻena noho i kēia manawa.  Ua hele koʻu pūnao a lohi i kēia mau mahina, no ka mea, he kanahākūmālima oʻu makahiki.  Nui nā kumu, nui nā ʻōlelo hōʻaloʻalo.

He kanahikukūmāhā kilokalame a i ʻole hoʻokahi haneli kanaonokūmākolu paona koʻu kaumaha i kēia kakahiaka!  Pono au e heluhelu i ka puke na Bob Greene.  He lā kūikawā kēia noʻu, no ka mea, ua hoʻoholo au e hoʻēmi kino!  ʻAʻole au makemake loa i koʻu kino i kēia manawa.  Inā kali au a hoʻēmi kino ma hope, ʻaʻole holo pono paha.

ʻO kēia lā ka hoʻomaka hou no ke kino hou!  I mua!

Ka puke na Bob Greene

A hui hou!




Nā huaʻōlelo:
hoʻēmi kino - diet,  다이어트,　ダイエット
hoʻoikaika kino - fitness,  피트니스,　フィットネス
momona - fat, 뚱뚱하다,　太っている
mea huna - secret,  비밀,　秘密
lole wāwae - pants, 바지,　ズボン
likiliki - tight,  꼭끼다,　きつい
hale hoʻoikaika kino - gym,  스포츠 센터,　スポーツクラブ
keʻena noho - apartment, 아파트,　アパート
pūnao - metabolism,  신진대사,　新陳代謝
ʻōlelo hōʻaloʻalo - excuse (n.),   변명,　言い訳

Nā Mele Kūhelu no ka Hoʻokūkū Pōwāwae Kauʻāina 2014

Aloha mai nō kākou e nā makamaka heluhelu, nā hoa mākaʻikaʻi i nā pāʻani pōwāwae a me koʻu mau hoaaloha! Pehea mai nei ʻoukou i kēia lā?

ʻEhā mele nā mele kūhelu no ka Hoʻokūkū Pōwāwae Kauʻāina 2014 wahi a ka ʻatikala ma Wikipikia.  Eia nō:

1.  Dar Um Jeito na Carlos Santana, Wyclef, Avicii, Alexandre Pires
2.  We are One (Ole Ola) na Pitbull, Jennifer Lopez, Claudia Leitte
3.  Tatu Bom de Bola na Arlindo Cruz
4.  La La La (Brasil 2014) na Shakira, Carlinhos Brown

Ua hoʻolohe au i kēia mau mele a pau, a i koʻu manaʻo, ʻo La La La (Brasil 2014) na Shakira ke mele maikaʻi loa!  Ua heluhelu au ma Wikipikia, ua hoʻopuka ʻo Shakira mā i ke mele ʻo Dare (La La La) ma mua i ka lā 28 o Malaki o kēia makahiki a laila, ua hoʻololi iki ʻo ia i ua mele nei a i hoʻopuka hou i ke mele ʻo La La La (Brasil 2014) ma hope ma ka lā 27 o Mei.  (ʻO ka lā 27 o Mei ka lā hānau o koʻu makuakāne...)  ʻOi aku ka wikiō o Dare (La La La) ma mua o La La La (Brasil 2014).  Eia kekahi, aia ʻelua mana o ke mele ʻo Dare (La La La), kekahi ma ka ʻōlelo Pelekāne a kekahi ma ka ʻōlelo Sepania.  Makemake au i ka mana ʻōlelo Sepania!  Eia ka loulou, inā makemake ʻoe e nānā i ka wikiō.  ʻO ka ʻōlelo Pukikī ka ʻōlelo kūhelu o Palakila.  No ke aha, ʻaʻohe mana ma ka ʻōlelo Pukikī kekahi?  No ke aha lā...

Mai ka wikiō ʻo Dare (La La La) na Shakira

A hui hou!




Nā huaʻōlelo:
mele - song,  노래,  歌
kūhelu - official,  공식,　公式な 
mana - version, 버전,  バージョン
no ke aha - why, 왜,  どうして

ʻO Fuleco ka ʻamakila kaulana

Aloha mai nō kākou e nā makamaka heluhelu, nā hoa mākaʻikaʻi i nā pāʻani pōwāwae a me koʻu mau hoaaloha! Pehea mai nei ʻoukou i kēia lā?

Ua nānā paha ʻoe i ka nūhou e pili ana i ka Hoʻokūkū Pōwāwae Kauʻāina ma ke kīwī a i ʻole ma ka pūnaewele?  Inā hoihoi ʻoe i ka Hoʻokūkū Pōwāwae Kauʻāina ʻoe, ua nānā paha ʻoe iā Fuleco.

ʻO wai ʻo Fuleco?  ʻĀ!  ʻO ka mea hoʻolaki kūhelu ʻo ia no Ka Hoʻokūkū Pōwāwae Kauʻāina o ka makahiki 2014 ma Palakila.  He ʻamakila  ʻekolu apo ke ʻano o kēia ʻamakila.  Ua heluhelu au ma Wikipikia, he ʻamakila ʻāpaʻakuma ma Palakila a he ʻane halapohe ka ʻamakila ʻekolu apo.  Ma ka ʻōlelo Pukikī, ʻo ka tuta-bola ka inoa o kēia ʻano ʻamakila.  ʻO ka ʻamakila ka manaʻo o tuta a ʻo ka pōpō ka manaʻo o bola. Eia ka mea hoihoi, hiki ke hoʻololi i ka ʻamakila ʻekolu apo kona kino e like me ka pōpō!  A pehea ka inoa o Fuleco?  Ua haku ʻia kēia inoa ʻo Fuleco mai nā huaʻōlelo Palakila ʻo futebol (pōwāwae) a ʻo ecologia (kālaikaiaola).  ʻO ka lā mua o Ianuali ka lā hānau o Fuleco.

ʻO Fuleco

ʻO Fuleco

He puke kākau me Fuleco

He nane ʻāpana me Fuleco

He ʻamakila ʻekolu apo

A hui hou!




Nā huaʻōlelo:
mea hoʻolaki - mascot,  마스코트,  マスコット
kūhelu - official,  공식,  公式な
ʻamakila - armadillo,  아르마딜로,　アルマジロ 
ʻamakila ʻekolu apo -  three-banded armadillo,  브라질세띠아르마딜로,　ミツオビアルマジロ 
ʻāpaʻakuma - endemic, 고유종,　固有種 
ʻane halapohe - endangered, 멸종위기,  絶滅寸前の
ʻōlelo Pukikī - Portuguese, 포르투갈어,  ポルトガル語
kālaikaiaola -  ecology, 생태학,  生態学
puke kākau - notebook,  공책,  ノート
nane ʻāpana - jigsaw puzzle, 직소 퍼즐,　ジグソーパズル

Ka Hoʻokūkū Pōwāwae Kauʻāina 2014

Aloha mai nō kākou e nā makamaka heluhelu, nā hoa mākaʻikaʻi i nā pāʻani pōwāwae a me koʻu mau hoaaloha! Pehea mai nei ʻoukou i kēia lā?

Ua hoʻomaka ka Hoʻokūkū Pōwāwae Kauʻāina o ka makahiki 2014 ma Palakila i ke kakahiaka nui o kēia lā.  I kēia manawa, ke pāʻani nei ʻo Palakila a ʻo Koloatia.  Na wai e lanakila ana?

Paʻahana nō au i kēia kakahiaka, no laila pōkole kēia ʻatikala.

Ka Hoʻokūkū Pōwāwae Kauʻāina

Ka Hoʻokūkū Pōwāwae Kauʻāina

Ma Google me nā pihi ma ka ʻōlelo Hawaiʻi

A hui hou!




Nā Huaʻōlelo:
pōwāwae - soccer,  축구,  サッカー
kauʻāina - international,  국제,  国際的な
Palakila - Brazil,  브라질,  ブラジル
Koloatia - Croatia,  크로아티아,  クロアチア